Foto: Sputnik International

Bryussel'de Kataloniyanıñ täuelsizdigin qoldauşılardıñ şerui ötti. 45 mıñğa juıq şeru qatısuşıları Euroodaqtıñ ştab-päteriniñ janında qızıl, sarı jäne kök tüsti Kataloniyanıñ tuın wstap, "Oyan, Europa!" dep wrandattı. Olar Euroodaqtıñ Kataloniyadağı sayasi dağdarıs kezinde Ispaniyanı qoldağanına narazı. Bwl turalı AFP aqparattıq agenttigi jazdı. 

Jinalğan köpşiliktiñ aldına şığıp, söz söylegen Kataloniyanıñ bwrınğı basşısı: "Sizder bwrın-soñdı qılmıskerlerdi qoldağan şerudi körgensiz be? Joq!",- dedi. Ol bwl pikiri arqılı Ispaniyanıñ özine qatıstı ayıp tağıp otırğanın meñzegen siyaqtı. Separatistik qozğalıs qatısuşıları Karles Pudjemontqa "Prezident, Prezident" dep ayqayladı.

AFP tilşileriniñ oqiğa ornınan jasağan reportajında şeru qatısuşıları Europa memleketteriniñ Ispaniya biliginiñ Kataloniyada ötken referendum qorıtındıların qabıldauına ıqpal etuin talap etetinderin aytadı. 73 jastağı Montserrat Mante: "Biz bügin Europağa  Ispaniyada demokratiya joqtığın aytuğa,  körsetuge keldik", -deydi.

Wyımdastıruşılar şeruge 20 mıñğa juıq adam keledi dep kütken. Nätije aldın-ala boljağan sannan eki esege artıq boldı. Katalandıqtardıñ köbi tündeletip kölik, avtobuspen 1 mıñ 300 km eñserip kelgen.

Ispaniya osı aptada bas bostandığınan ayırılu qaupinen saqtanıp, Bryussel'ge ketken Karles Pudjemont pen Kataloniyanıñ bwrınğı 4 ministrine jariyalanğan Europalıq twtqındau turalı orderdiñ küşin joyğanımen, eks-basşılar äli de Otandarına oralu turalı şeşim qabıldamadı.

Ispaniya Prem'er-ministriniñ orınbasarı Sorayya Santamariya 21 jeltoqsanda ötetin Kataloniya Prezidentiniñ saylauına qatısuğa niet bildirgen Karles Pudjemonttı: "Ädette kandidattar saylaualdı kampaniyasın ötkizip, halıqtıñ aldına keluşi edi. Bügin saylauşılar kandidattıñ aldına özderi barıp otır" dep, keleke qıldı.

“The Qazaq Times”