Foto: scpr.org

AQŞ sportşılarınıñ Oñtüstik Koreyada ötetin qısqı Olimpiada oyındarına qatısu, qatıspauı äli belgisiz –dep mälimdedi AQŞ-tıñ Birikken Wlttar Wyımındağı twraqtı ökili Nikki Heyli.

Nikki Heylidiñ sözinşe, 2018 jılı Oñtüstik Koreyada ötetin qısqı Olimpiada oyındarına AQŞ sportşılarınıñ qatısu, qatıspauı Korey tübegindegi jağdaylarğa baylanıstı. Degenmen de Aq üy Amerika sportşılarınıñ qauipsizdigi üşin bar küş-quatın paydalanadı. Bwl sportşılar üşin öte ülken mümkindik. Olar osı arqılı qiındıqtardı jeñudi üyrenedi.

Qazirgi tañda Koreya tübegindegi sayasi jağday twraqtı emes. AQŞ pen Soltüstik Koreya arasındağı kikiljiñ uaqıt ötken sayın uşığuda. Soltüstik Koreya AQŞ pen Birikken Wlttar Wyımınıñ qarsılığına qaramastan öziniñ ballistikalıq zımırandarın sınaqtan ötkizuin jalğastıruda.

Jalpı, 2018 jılı Oñtüstik Koreyada ötetin qısqı Olimpiada oyındarı el esinde eñ daulı Olimpiada bolıp qalatını sözsiz. Sebebi jaqında Halıqaralıq Olimpiada komiteti öz tarihında bwrın soñdı bolmağan şeşim şığarğan. Ol Resey qwramasın 2014 jılğı doping dauına baylanıstı «Phençhan-2018 qısqı Olimpiada oyındarınan» şettetken. HOK şeşimi boyınşa, reseylik sportşılar Oñtüstik Koreyağa tek beytarap qwrama retinde ğana bara aladı.

“The Qazaq Times”