Qıtaydıñ Jilin provinciyasındağı şekara şarlauşıları. Foto: Cetusnews.

Qıtaydıñ Soltüstik Koreyamen şekaralasatın provinciyasınıñ resmi basılımdarı küşti yadrolıq jarılıs bolğan jağdayda ne isteu kerektigi turalı keñester berude. Bwl turalı «The New York Times» basılımı habarladı.

AQŞ pen Oñtüstik Koreyanıñ birlesken oqu jattığuı kezinde, Soltüstik Koreyamen şekaralasatın Qıtaydıñ Jilin provinciyasınıñ resmi basılımı «Jilin Rıbau» (Jilin Ribao/吉林日报) basılımı aymaqtağı twrğındarğa yadrolıq jarılıs bolğan jağdayda ne isteu kerektigi turalı keñester berude.

Osıdan bwrın AQŞ prezidenti Soltüstik Koreya öziniñ yadrolıq jäne zımıran bağdarlamalarınan bas tartpaytın bolsa, qauiptiñ aldın alu şaraların jasaytının birneşe ret mälimdegen bolatın. Degenmen, naqtı qanday qadamdarğa baratının aytpağan. Bir apta bwrın Gavayidağı «Qırği qabaq soğısı» kezindegi soğıs eskertu jüyesi qalpına keltirildi. Bwl jüyeniñ qalpına keltirilui twrğındardı yadrolıq soğıs qaupinen alañdatuda.

«Jilin Ribao» basılımı jariyalanğan maqalada radioaktivti lastanudıñ äserin azaytudıñ ärtürli joldarın qarastıradı. Onda osığan deyingi radioaktivti lastanudan saqtanu turalı AQŞ-tağı jäne özge elderdegi täjiribelerdi de alğa tartqan. Radioaktivti säuleler men şañnan qorğanatın kiimderdi kiyu jäne zalalsızdandıru joldarı da tüsindirilgen.

Soltüstik Koreya men AQŞ jäne onıñ odaqtas elderi arasındağı äskeri äreketter men türli şaralardıñ salmağı artqan sayın, öñirdegi twrğındar tuıluı mümkin yadrolıq soğıstıñ qauipine alañdauşılıq bildirgen.

“The Qazaq Times”