Kezdesu. Foto: mfa.kz

Keşe Qazaqstannıñ Sırtqı ister ministri Qayrat Äbdirahmanov Birikken Wlttar Wyımınıñ Süriya mäselesi jönindegi Arnayı uäkili Staffan de Misturamen kelissözder ötkizdi. Bwl turalı ministrliktiñ resmi saytı habarladı. 

Kezdesudiñ bastı taqırıbı Astanada ötetin siriyalıq dağdarıstı retteuge bağıttalğan Süriya Arab Respublikası Ükimeti men süriyalıq qarulı oppoziciya arasındağı halıqaralıq kezdesuge qatıstı boldı.

S. De Mistura süriyalıq kelissözderdi Astanada ötkizuge kelisimin bergen Qazaqstannıñ Prezidenti Nwrswltan Nazarbaevqa BWW Bas hatşısı Antoniu Guterriştiñ atınan alğısın bildirip, jahandıq wyım Astana basqosuın ötkizu bastamasın birinşi bop qoldağanın atap ötti.

Delegattar. Foto: mfa.kz

Öz kezeginde Q. Äbdirahmanov Qazaqstan BWW-n Süriya dağdarısına qatıstı kelissözderdi wyımdastıru ürdisiniñ bastı qatısuşı tarapı retinde tanitının jäne Astanada ötetin kezdesu Jenevadağı beybit kelissözderdiñ kezekti otırısın ötkizuge oñ äserin tigizetinin bildirdi.

Äñgime barısında diplomattar sonımen qatar Astana kezdesuine qatıstı barlıq wyımdastıruşılıq mäselelerdi de talqığa salıp, süriyalıq dağdarıstı retteudi közdegen belsendi is-qimıldardı odan äri jalğastıru qajet ekenin atap ötti.

Qazaqstannıñ Sırtqı ister ministri S. De Misturanı elimizdiñ beybitşil bastamaları jayında jäne Qazaqstannıñ BWW Qauipsizdik Keñesiniñ müşesi retindegi jwmısınıñ basımdıqtarınan habardar etti.

Sonday-aq, däl sol küni Q. Äbdirahmanov Astanada ötetin Süriyadağı jağdaydı retteu boyınşa halıqaralıq kezdesuge qatıstı türli mäselelerdi talqılau maqsatımen Iran Islam Respublikası, Resey Federaciyası jäne Türkiya Respublikası delegaciyalarınıñ basşılarımen kezdesu ötkizdi.

"The Qazaq Times"