Büginge deyin tüp tamırı Qıtaydan bastalğan COVID-19 virusı 2 mln 892 mıñ adamğa jwğıp, 202 mıñ 500-ge tarta adamnıñ ajalına sebepker boldı. Älemniñ ekonomikası, tehnologiyası, medicinası damığan alpauıt elderiniñ öziniñ şañırağın şayqaltıp twrğan virus onsızda işki qaqtığıstar men azamattıq soğıstıñ zardabınan köz aşpay tolassız bosqan bosqındarına tosqauıl qoya almay otırğan Tayau Şığıstıñ halin tipten auırlatıp baradı.

Koronavirustiñ keñinen tarqaluına qosanjarlap bar tağdırın qara altınğa baylağan Tayau Şığıs elderi üşin soñğı kezderdegi mwnay bağasınıñ şekten tıs qwldırauı tipten jığılğanğa jwdırıq bolıp tiip jatır.

Irak, Livan sekildi key elderdegi ötken küzden beri üdep ketken ükimetke narazılıqtar epidemiya sebebimen bäseñdegenimen ekonomika üşin ülken soqqı bolıp tiip jatır. Aytalıq halıqaralıq valyuta qorınıñ mälimetinşe Tayau Şığıs, Auğanstan, Päkistan, Afrika ekonomikası 3,1 payızğa kemigen. Bwl körsetkiş aldağı uaqtta üdey tüsui bek mümkin.

Osı rette gumanitarlıq wyımdar osı ölkede ornalasqan bosqındar lagerindegi  eñ berisi su tapşılığınıñ özi epidemiyalıq jağdaydıñ asa auır ekenin habarlap otır.

Al resmi derekterde pandemiya äli Tayau Şığısta taralmağan.  Densaulıq saqtau jüyelerin tügelge juıq küyretken qanşa uaqıttan bergi qandı soğıs aymaq twrğındarın auruhanağa barğannan göri üyinde jatıp köz jwmuına mäjbürleytini, tipti sol aymaqtarda epidemiyalıq testileudiñ qol jetimsizdigi resmi mälimettiñ ötirik ekenin körsetedi.

Koronavirustıñ alğaşqı oşağı bolğan Qıtaymen jaqın aralasıp, elge kelgenderge tosqauıl qoymay, virustıñ alğaşqı tarqalu kezeñderin jasırğan. Sonıñ saldarınan Qıtay älemdik virus oşağı bolsa, Iran Parsı şığanağınıñ virus oşağına aynaldı. Şığanaqtağı elderge negizinen Irannan tarqay bastadı.

Naurızdıñ basında komendanttıq sağat engizip, bazarlar men mektepterdi jauıp, aymaqtar aralıq transporttı toqtatqan Süriyada aydıñ ayağında alğaşqı virus jwqtırğan adamdı jariyaladı. Soñğı on jıldan bergi tolassız soğıs saldarınan sansırap densaulıq saqtau jüyeleri tügelge derlik küyregen Damasktiñ de anıq aqparat bermey, iä bolmasa bere almay otırğanı anıq.

Düniejüzilik densaulıq saqtau wyımı Süriyanıñ soltüstigi pandemiyanıñ kelesi oşağı boluı mümkin dep eskertti.

Virustıñ taraluına Irandı jazğırğan Livandağı şitterdiñ «Hezbolla» tobı osı epidemiyanı paydalanıp eriktilerdi jäne medbikeler men därigerdi jaldap köşpeli auruhana qwrıp el senimine kiruge tirisıp jatqanıda aytılıp jatır. Bwl eldiñ ekonomikası biıl 12 payızğa qısqaruı mümkin deydi halıqaralıq valyuta qorı.

Mwnay bağasınıñ qwlauı Livan, Süriya, Irak ükimetteriniñ künkörisinen ayırılğandarğa töleytin qarajatınıñ joqtığınan koronavirustan bwrın aşarşılıq qattı qıspaqqa aluı mümkindigi aytıluda.

Parsı şığanağındağı köp el endi ğana şwğıl şaralar qabıldap, halıqtı jappay testleuge köşip jatır.

Soñğıı derek. COVID-19: Iranda - 89 328, köz jwmğan 5 650, Saud Arabiyasında - 16299, köz jwmğan 136, Birikken Arab ämirlikterinde - 9813, köz jwmğan 71, Irakta - 1763, köz jwmğan 86,  Omanda - 1905, köz jwmğan 10, Bahreynde - 2588, köz jwmğan 8, Süriyada - 42 adam, köz jwmğan 3, Livanda 704, köz jwmğan 24 adam dep körsetilgen.

"The Qazaq Times-