Parsı şığanağındağı eki el arasında şielenis uşıqtı. Foto: Wikipedia.

Orta Şığıstağı eki ülken bäsekeles elder Iran men Saud Arabiyası arasındağı şielenistiñ örşuine baylanıstı, eki kün bwrın Iran prezidenti Hasan Ruhani Saud Arabiyasına qatañ eskertu jasadı. Ol Saud jwrtına otpen oynamauğa keñes bergen edi. Bwl turalı «Şinhuanıñ» resmi saytı habarladı.

Franciyanıñ AFP taratqan habarlarğa qarağanda, Tehrannıñ qoldauımen Yemendegi  bülikşil küşter Riyadqa qara zımıran attqannan keyin, Arabiyasınıñ taq mwrageri Mwhammed bin Salman «Bwl Irannıñ Saud Arabiyasına aşıq soğıs jariyalauı» dep bağaladı.

Iran prezidenti Hasan Ruhani memlekettik telearnada söylegen sözinde Saud Arabiyasına qarata: «Sender Irannıñ öñirdegi quatı men ıqpalın anıq bilesiñder, ol senderdiñ öñirdegi jasay almağan märtebeleriñnen älde qayda küşti. Sender eşteñe de emessiñder!», – dep zildi sözder arnağan edi. Ol tağı sözinde: «Qwrama Ştat pen onıñ odaqtastarı bizben küresu üşin är türli täsilderdi jwmıldırdı, biraq eşteñe de jasay alğan joq», – dedi. Onıñ bwndağı aytıp otırğanı 1980 jıldarı Iraktıñ Batıs jäne Arab elderiniñ qoldauımen jañadan qwrılğan Iran Islam Respublikasına qarata aşqan soğısı. Şığanaq soğısı dep atalatın bwl qaqtığıs 8 jıldan keyin ayaqtalğan edi.

Iran prezidentiniñ sözinde: «Eger sender Irandı dos dep qaramasañdar, onda AQŞ pen evrey rejimi senderge dos bolğanı. Sender strategiyalıq jäne ölşemdik twrğıda qatelesip twrsıñdar», – dedi. Onıñ bwl sözi Izrail'diñ prem'er-ministri Bin'yamin Netan'yahudıñ jaqında jasağan bayandamasında aytılğan: «Irannıñ «qauip-qateri» turalı soñğı eskertuler Izrail' men arab körşileri arasında bwrın-soñdı bolmağan tığız qarım-qatınasqa äkeldi», – degen sözine qarata aytıldı.

Eki el ükimetiniñ bwl teke-tiresi Orta-Şığıs aymağında jaña qaqtığısqa jol aşuda. Iran prezidentiniñ bwl pikirleri şın mänisinde soğıs aşu aldındağı ündeuge köbirek wqsaydı. Iran men Saud Arabiyası öñirde Resey men AQŞ-tı arqa süyer etken jaña maydandı aşqalı twr.

“The Qazaq Times”