Foto: Iran Daily

Ortalıq Barlau basqarmasınıñ Irannıñ "Äl-Kaida" lañkestik wyımımen baylanısın rastaytın derekteri jariyalanğannan keyin, Irannıñ Sırtqı İster ministri Javad Zarif öziniñ tvitter paraqşasında tağılğan barlıq ayıptardı joqqa şığaratın jazba jariyaladı. Bwl turalı Äl-Jazira aqparattıq agentigi jazdı. 

Irannıñ Äl-Kaidamen baylanısı bolğan degen mälimdeme Usama ben Ladenniñ qwjattarın jariyalau kezinde jasaldı. 2001 jılı 11 qırküyekte bolğan oqiğanı wyımdastıruşı Äl-Kaidanıñ basşısı 2011 jılı AQŞ jasağınıñ qolınan qaza tapqan bolatın.

Iran jariyalanğan qwjattardıñ jalğan ekenin alğa tartıp otır. Javad Zarif 2001 jılı bolğan, "terrorizmge qarsı küres" wranımen Islam memleketterine qarsı soğıs aşuğa sebep bolğan qayğılı oqiğa AQŞ-tıñ qolımen wyımdastırılğanına senimdi.

Iran terrorizmdi qoldağanı jäne tıyım salınğan wyımdarmen baylanısı üşin birinşi ret ayıptalıp otırğan joq. Köp jıldar boyı bwl ayıptaulardı batıstıq propagandağa balap kelgen Iran Ükimeti qazir özin ekstremizmge qarsı küresuşi memleket retinde wsınıp jür. AQŞ-tıñ mälimdemelerin Irannıñ älemdik sahnadağı bedeline nwqsan keltiru üşin jasalğan äreket dep tanığan Javad Zarif memlekettiñ "Dosımnıñ jauı-meniñ dosım" qağidasın wstanbaytının jetkizdi. Äl-Kaida - AQŞ-tıñ jauı. Biraq ol Iran üşin de dos bola almaydı. Javad Zariftiñ sözderinen tüsingenimiz, terrorlıq wyımnıñ wstanımdarı Irannıñ rejimine qarsı.

Ol: "Iran Süriya men Iraktağı terrorizmge qarsı küreske qatıspağanda, qazir bwl memleketter "Islam memleketi wyımınıñ qolında bolar edi", - dedi.

“The Qazaq Times”