Foto: inform.kz

Jaqında Tarazdıq oquşınıñ Stiven Hokingpen kezdesui tağı keyinge şegerildi, – dep habarlaydı  Tengrinews  tilşisi. Bwl turalı Isaak Mustopulo Facebook jelisindegi paraqşasında mälimdedi.

Tarazdıq oquşı Isaak Mustopulo ağılşın ğalımı Stiven Hokingpen 8 joltaqsanda kezdesui kerek bolğan. Sol uaqıtta ol feysbuk paraqşasında quanışımen bölisip: «Armandar orındaladı! Men Hoking mırzağa meniñ elimniñ qanday ekenin, bizdiñ elimizdiñ qanday ekenin aytamın», – degen bolatın. Alayda, oquşınıñ saparı 2017 jıldıñ, 21 qañtarına auıstırılğan edi. Tayauda ol kezdesudiñ de Stiven Hokingtiñ uaqıtınıñ tığızdığına baylanıstı keyinge şegerilgendigin AQ  "Tehnologiyalıq damu boyınşa wlttıq agenttik" ökilderi habarladı.

Isaak Mustopulo atalmış agenttik wyımdastırğan  konkurstıñ arnayı jüldesine ie bolğan. Jüldeni tabıstau kezinde oquşı Hokingpen kezdesudi armandaytının, öziniñ de fizik bolğısı keletindigin aytqan. Agenttik qızmetkerleri balağa kömek berudi oylastırıp, älemge äygili ğalımnıñ adamdarımen kelissöz jürgizedi.   Keyin ğalım kezdesuge qarsı emes ekenin jetkizgen bolatın.

Wlttıq agenttiktiñ mamanı Damir Töleusariev bılay dep mälimdedi:

"Qazirde bwl sapardı Qazaqstandağı British Council qolğa alğan. Olar Hokingtiñ komandasımen jii habar alısıp twradı. Al ğalımnıñ aynalasındağılar kezdesudi Stivenniñ uaqıt tığızdığı men densaulıq jağdayına baylanıstı şegere twrudı swraydı. Kezdesu bolmaydı degen söz emes, tek keyinge qaldırıldı. Uaqıtın şamalap ta ayta almaymız. Biraq, kezdesu wzaq uaqıtqa qaldırılmağandığın ayttı".

"The Qazaq Times"