تارازدىق وقۋشىنىڭ ستيۆەن حوكينگپەن كەزدەسۋى كەيىنگە شەگەرىلدى

جاقىندا تارازدىق وقۋشىنىڭ ستيۆەن حوكينگپەن كەزدەسۋى تاعى كەيىنگە شەگەرىلدى، – دەپ حابارلايدى  Tengrinews  ءتىلشىسى. بۇل تۋرالى يسااك مۋستوپۋلو Facebook جەلىسىندەگى پاراقشاسىندا مالىمدەدى.

تارازدىق وقۋشى يسااك مۋستوپۋلو اعىلشىن عالىمى ستيۆەن حوكينگپەن 8 جولتاقساندا كەزدەسۋى كەرەك بولعان. سول ۋاقىتتا ول فەيسبۋك پاراقشاسىندا قۋانىشىمەن ءبولىسىپ: «ارماندار ورىندالادى! مەن حوكينگ مىرزاعا مەنىڭ ەلىمنىڭ قانداي ەكەنىن، ءبىزدىڭ ەلىمىزدىڭ قانداي ەكەنىن ايتامىن», – دەگەن بولاتىن. الايدا، وقۋشىنىڭ ساپارى 2017 جىلدىڭ، 21 قاڭتارىنا اۋىستىرىلعان ەدى. تاياۋدا ول كەزدەسۋدىڭ دە ستيۆەن حوكينگتىڭ ۋاقىتىنىڭ تىعىزدىعىنا بايلانىستى كەيىنگە شەگەرىلگەندىگىن اق  "تەحنولوگيالىق دامۋ بويىنشا ۇلتتىق اگەنتتىك" وكىلدەرى حابارلادى.

يسااك مۋستوپۋلو اتالمىش اگەنتتىك ۇيىمداستىرعان  كونكۋرستىڭ ارنايى جۇلدەسىنە يە بولعان. جۇلدەنى تابىستاۋ كەزىندە وقۋشى حوكينگپەن كەزدەسۋدى ارماندايتىنىن، ءوزىنىڭ دە فيزيك بولعىسى كەلەتىندىگىن ايتقان. اگەنتتىك قىزمەتكەرلەرى بالاعا كومەك بەرۋدى ويلاستىرىپ، الەمگە ايگىلى عالىمنىڭ ادامدارىمەن كەلىسسوز جۇرگىزەدى.   كەيىن عالىم كەزدەسۋگە قارسى ەمەس ەكەنىن جەتكىزگەن بولاتىن.

ۇلتتىق اگەنتتىكتىڭ مامانى دامير تولەۋساريەۆ بىلاي دەپ مالىمدەدى:

"قازىردە بۇل ساپاردى قازاقستانداعى British Council قولعا العان. ولار حوكينگتىڭ كومانداسىمەن ءجيى حابار الىسىپ تۇرادى. ال عالىمنىڭ اينالاسىنداعىلار كەزدەسۋدى ستيۆەننىڭ ۋاقىت تىعىزدىعى مەن دەنساۋلىق جاعدايىنا بايلانىستى شەگەرە تۇرۋدى سۇرايدى. كەزدەسۋ بولمايدى دەگەن ءسوز ەمەس، تەك كەيىنگە قالدىرىلدى. ۋاقىتىن شامالاپ تا ايتا المايمىز. بىراق، كەزدەسۋ ۇزاق ۋاقىتقا قالدىرىلماعاندىعىن ايتتى".

"The Qazaq Times"