Foto: news.ivest.kz

Qazaqstannıñ sauda jelileri men irili-wsaqtı köterme saudamen aynalısıp jürgenderdiñ esebine qarağanda kartop bağası qıs mezgilinde 250-300 teñgege deyin qımbattauı mümkin. Bwl turalı energyprom.kz saraptamasında aytılğan.

Agrarilerdiñ sözinşe, biıl Qazaqstanda da basqa elderde de  aua rayı qolaylı bolmağandıqtan egin kölemi köp emes. Qazirgi uaqıtta otandıq kartoptardıñ köterme bağası 55 teñgeni qwraydı. Al bwrındarı küz kezinde bağa 35 teñgeden aspaytın.

Saraptama agenttiginiñ mälimetinşe, ötken jılğı otınğa, qosalqı bölşekterge, gerbicidterge, tıñaytqıştarğa ketken şığındardı eseptegende bağanıñ ösui orındı jağday. Sebebi 1 gekter jerge kartop ösirudiñ özine 1 mln teñgege juıq qarjı ketedi eken.

Osı jılı ortaşa bir gektardan jinalatın önim kölemi  230 centnerdi qwraydı. Al köterme bağa 55 teñge bolğan jağdayda agrarilerdiñ tabısı köp bolmaydı. Sonday-aq, kartop qoymalarğa jinalğan kezde onıñ keminde 10 payızı jaramsız boladı äri qoyma şığındarı tağı bar. Sondıqtan fermerler bağanıñ köteriluinen tabıs joğarı boladı dep esepteydi. Boljaldı bağa şamamen 90-130 teñge boluı kerek eken.

Bwdan bölek, 2017 jıldıñ qırküyek ayınıñ qorıtındısı boyınşa Qazaqstanda qiyar bağası birden 20,4 payızğa köterilgen. Bwl qiyardı jinau mausımınıñ ayaqtalumen baylanıstı.

Al arzandağan kökönister mınalar: piyaz (24,8%), säbiz (14,9%), qızılşa men oramjapıraq (7,7%), qızanaq (7,1%), sarımsaq (4,3%).

 “The Qazaq Times”