Qırğız ortalıq qalası Bişkekke Özbekstan prem'er-ministri kelip, eki ükimet arasında jaña keñes ornap otır. Özbekstannıñ ükimet basşısı Abdulla Äripov resmi saparında, qırğız basşısı Almazbek Atambaevpen kezdesti. Qazir eki eldiñ ükimet arasında şekara daulı tüyinderimen, el aralıq qarım-qatınastı retke salu isteri talqılanuda. Bwl özbek elinde ornağan jaña ükimet sapınan keyin, qırğız ben özbek arasında ıntımaqtastıqtı jolğa qoyğan ülken qadam dep sanaladı.

Qırğızstannıñ ükimet ökilderi Özbekstan joğarı lauazımdısınıñ saparı jäne eki el ükimetaralıq komissiyanıñ otırısı ekijaqtı qarım-qatınastardıñ damuına jaqsı ıqpal körsetedi dep bağalap otır. Sonımen körşiles äri bauırlas eki el arasında tüsinistikter men keñşilikter ornağalı twr dep ümittenuge boladı.

Özbek-qırğız arasında ornağan şekaralıq qayşılıqtarğa wzaq uaqıt boldı. Eki el arası Islam Kärimovtıñ twsında birde tatu, birde qatu boldı. Özbekstan biliginiñ auısuınan köp ötpey, qırğız eliniñ de bilik sapı jañaru aldında twr. Endi oñtüstigimizdegi eki tuıs körşimiz ıntımaq izdep jatsa qwba-qwp demeske bolar ma?! Alayda, şekara öñirde qordalanğan mäsele birşama kürdeli. Eki elge kezek ötip jatqan şekaralıq auıldardıñ bölis mäselesi, ondağı qırğız, özbek wlttarınıñ qonıstanuı, oğan qosa asa mañızdı bolğan şekaralıq su mäselesin oñdı şeşuge tural keledi.

Qazirgi uaqıtta qırğız ükimetin basqarıp otırğan Jwmağwl Sodanbekov eki el arasındağı tüsinbestik pen iritkilerdi bwrınğı Özbekstan biliginiñ mensinbeuşiliginen kelip şıqtı degen pikirin eki ükimet arasındağı otırısta aşıq ortağa saldı. Ol sözinde: «On jıldan beri qalıptasıp kelgen kirbeñdik, prezident Kärimovtıñ qatal sayasatınan tuındadı. Ol kisi qatal adam edi. Qırğızstandı älsiz el sanaytın közqarasınan aynımadı. Tipti, su mäselesine kelgende soğıs aşu qadamına da bara jazdadı. Mine osınday birjaqtı, tura emes sayasattıñ saldarınan mämileler bwzılğan edi. Al, Şavkat Mirziyaev kelip, atmosfera özgerdi. Körşi eldermen mämileni jaqsartu sayasatın jolğa qoyıp otır. Özbekstan osığan deyin özimen şektesken üş el  – Qazaqstan, Qırğızstan, Täjikstanmen de qarım-qatınası jaqsı emes edi», – dedi.

2005 jılı Ändijan oqiğası jäne 2010 jılı Qırğızstandağı Oş oqiğasınan keyin eki el şekarası bir taraptı jabıldı. Şekaralıq qarım-qatınasta qatañdastırıldı. Bwl ärine eki eldiñ de sauda-sattıq isterine ülken keri äserin tigizgen bolatın. Degenmen äzirdiñ özinde de eki el şekarasında qalıptı sauda-sattıq qalıptasıp kete qoyğan joq.

Qırğızstan men Özbekstan bölip alğan Ferğana aymağı qırğız ben özbektiñ bastı qayşılığı. Şekara mañında janjaldar men oq şığaru oqiğaları ärkezde de bolıp keledi. Osı mäselelerdi bir şeşimge şığarıp, eki el arasındağı kirbeñdikti joyu üşin bıltırğı jıldıñ osı uaqıtınan beri qırğız-özbek ükimetteri 14 ret kezdesu otırısın ötkizgen eken.

Bwl otırıstardıñ naqtı nätijeleri körinbegen künniñ özinde, on jıldan beri bir-birine toñteris qarap kelgen bauırlas eki el, bereke izdep, tatulıqqa bet bwrğanı anıq boldı. Qırğızstan men Özbekstan arasındağı tatulıq pen salqındıq bauırlas jäne Orta Aziyanı böle qonıstanğan biz üşin de özindik äserin tigizedi. Sondıqtanda, wlı Twran dalasınıñ qwdiretti küş aluı üşin tamırı bir ağayınnıñ tatulığın biz de qalar edik.

“The Qazaq Times”