Sovet äskeri qırğan Baku twrğındarı. Qaralı qañtar. Foto: azeri.lt

Aldağı 13 qañtar küni sağat 17:00-de Astanadağı Twñğış prezident kitaphanasınıñ muzeyinde «Qaralı qañtar» - Täuelsizdikke jol» attı fotokörme ötedi. Körme 1990 jılı Bakude bolğan tragediyağa baylanıstı bolmaq. Bwl turalı Qazaqstandağı Äzerbayjan Respublikası Elşiliginiñ baspasöz qızmeti habarladı.

Fotokörmeni «Mädeniet ıqpaldastığındağı dialog»  halıqaralıq muzey jobası ayasında, Äzerbayjan elşiligi men Twñğış prezident kitaphanası birlese wyımdastırıp otır.

Äzerbayjan eli 20 qañtardı qaralı kün retinde eske alıp keledi. Osıdan 27 jıl bwrın, 19-nan 20 qañtarğa qarağan tüni Sovet Odağı basşılığınıñ bwyrığımen Bakuge qarulı äsker kirip, beybit twrğındardı oqqa wstadı. Äsker kirmes bwrın, qarapayım halıq Armeniyanıñ Äzerbayjanğa qarulı agressiyasın toqtatu turalı, Odaq pen Respublika basşılarına narazılıq retinde miting ötkizgen bolatın. YAğni, Äzerbayjan territoriyası sanalatın Taulı Qarabah oqiğasına baylanıstı talaptarın bildirgen.

19 qañtar küni sovettik memlekettik qauipsizdik komitetiniñ «Al'fa» erekşe bölim jasaqtarı Äzerbayjan telearnasınıñ energoblogın talqandap jiberdi. Jwrt ne bolıp jatqanınan habarsız qaldı. Tek qalada tötenşe jağday jariyalanğanın tek qalanı basıp alğan Sovet armiyasınıñ tikwşaqtardan tastağan ügit qağazdarı arqılı ğana bildi.

Baku köşesindegi Sovet tankisi. Foto: trend.az

Sol küngi qandı oqiğadan 134 beybit twrğın qaza tauıp, 700-dey adam jaralandı. Äskeri tehnika adamdardıñ tobın taptap ötti. Äsker kirgen soñ, qarsı şıqqan belsendilerdi twtqınday bastadı. Bwğan qaramastan, 22 qañtar küni qaytıs bolğan adamdardıñ janazasına 1 millionnan astam adam qatıstı. Qwrbandar qoyılğan sol Taulı baq, osı küni Batırlar alleyası dep ataladı. Bwl kün Äzerbayjan tarihına «Qaralı qañtar» bolıp endi.

Arada qanşa uaqıt ötse de, Äzerbayjan halqı osı kündi ardaqtap, är jılı 20 qañtardı qasiretti kün retinde eske aladı.

Osığan baylanıstı Äzerbayjan-Qazaqstan eki el fotokörme arqılı jwrt nazarın «Qaralı qañtarğa» audarmaq. Sol arqılı, qarulı äskerdiñ beybit twrğındardı qan qasapqa salğan auır tragediyasın qoğammen birge bölispek.

Bwl fotolar Äzerbayjan halqınıñ küşti, quattı ruhınıñ tiri kuäsi. Erlikpen qaza bolğandarıñ isi – azazttıq jäne Otan wğımdarınıñ bos söz emes ekenin däleldeydi.

1990 jılğı 20 qañtar oqiğası Sovet Odağınıñ ıdırauındağı qozğauşı küşterdiñ biri boldı. Ssonday-aq, Äzerbayjanğa bağa jetpes täuelsizdikti alıp berdi deuge boladı.

"The Qazaq Times"