QR Wlttıq banki. Foto: Kursiv.kz

Qazaqstan Respublikasınıñ Wlttıq Banki bazalıq mölşerlemeni +/-1% dälizben 10,5%- ğa deyin tömendetu turalı şeşim qabıldadı. Bwl turalı Wlttıq banktiñ baspasöz qızmeti habarladı.

Wlttıq banktiñ mälimetinşe, jıldıq inflyaciya nısanalı dälizde ornıqtı, halıqtıñ inflyaciyalıq kütuleri qalıptı, ekonomika belsendiliginiñ jandanğanı bayqaladı. Qalıptasıp jatqan aqşa-kredit talaptarın eseptegende jäne küyzelister bolmağan jağdayda inflyaciya 2017 jäne 2018 jıldarı belgilengen nısanalı däliz şeginde boladı.

"Inflyaciyalıq qısımnıñ ekonomikanıñ jäne jiıntıq swranıstıñ öte jıldam qalıpqa kelui jağdayındağı täuekelderi aytarlıqtay dep bağalanbaydı. Ekonomikanıñ damuınıñ bazalıq scenariyiniñ iske asırıluı (mwnay bağası – bir barrel' üşin 50 AQŞ doll.) , sonday-aq jağımsız küyzelister bolmağan jäne inflyaciyanıñ naqtı serpini boljanatın ölşemderge säykes kelgen jağdayda aldağı 12 ayda bazalıq mölşerlemeniñ tömendeu ürdisi jalğasuı mümkin. Wlttıq Bank naqtı payızdıq bazalıq mölşerlemeni ekonomikanıñ ösuiniñ wzaq merzimdi äleuetti qarqınımen salıstırmalı deñgeyde wstap twratın boladı", - delingen baspasöz habarlamasında.

Bazalıq mölşerleme boyınşa şeşim mınaday faktorlar eskerile otırıp qabıldandı:

  • Jıldıq inflyaciya 2017 jılğı mamırda nısanalı däliz şeñberinde 7,5% mölşerinde qalıptastı jäne Wlttıq Banktiñ bağalarına tolığımen säykes kelui;
  • teñge bağamınıñ ağımdağı deñgeyde saqtaluı boyınşa twraqtı kütuleri ayasında salımşılardıñ valyutalıq basımdığınıñ özgerui;
  • Ekonomikadağı iskerlik belsendilik;
  • Aqşa-kredit talaptarı bazalıq mölşerleme tömendegennen keyin qalıptı-qatañ deñgeyden beytarap deñgeyge deyin jwmsaruı.

Bazalıq mölşerleme boyınşa kezekti şeşim 2017 jılğı 17 şildede Astana uaqıtı boyınşa sağat 17.00-de jariyalanatın boladı.

Ayta keteyik, Wlttıq bank bwğan deyin bazalıq mölşerlemeni 12%-dan 11%-ğa deyin tömendetken. 2016 jılı bwl körsetkiş 17% deñgeyinde bolğan.

“The Qazaq Times”