ۇلتتىق بانك بازالىق مولشەرلەمەنى تومەندەتتى

قازاقستان رەسپۋبليكاسىنىڭ ۇلتتىق بانكى بازالىق مولشەرلەمەنى +/-1% دالىزبەن 10,5%- عا دەيىن تومەندەتۋ تۋرالى شەشىم قابىلدادى. بۇل تۋرالى ۇلتتىق بانكتىڭ ءباسپاسوز قىزمەتى حابارلادى.

ۇلتتىق بانكتىڭ مالىمەتىنشە، جىلدىق ينفلياتسيا نىسانالى دالىزدە ورنىقتى، حالىقتىڭ ينفلياتسيالىق كۇتۋلەرى قالىپتى، ەكونوميكا بەلسەندىلىگىنىڭ جاندانعانى بايقالادى. قالىپتاسىپ جاتقان اقشا-كرەديت تالاپتارىن ەسەپتەگەندە جانە كۇيزەلىستەر بولماعان جاعدايدا ينفلياتسيا 2017 جانە 2018 جىلدارى بەلگىلەنگەن نىسانالى ءدالىز شەگىندە بولادى.

"ينفلياتسيالىق قىسىمنىڭ ەكونوميكانىڭ جانە جيىنتىق سۇرانىستىڭ وتە جىلدام قالىپقا كەلۋى جاعدايىنداعى تاۋەكەلدەرى ايتارلىقتاي دەپ باعالانبايدى. ەكونوميكانىڭ دامۋىنىڭ بازالىق ستسەناريىنىڭ ىسكە اسىرىلۋى (مۇناي باعاسى – ءبىر باررەل ءۇشىن 50 اقش دولل.) ، سونداي-اق جاعىمسىز كۇيزەلىستەر بولماعان جانە ينفلياتسيانىڭ ناقتى سەرپىنى بولجاناتىن ولشەمدەرگە سايكەس كەلگەن جاعدايدا الداعى 12 ايدا بازالىق مولشەرلەمەنىڭ تومەندەۋ ءۇردىسى جالعاسۋى مۇمكىن. ۇلتتىق بانك ناقتى پايىزدىق بازالىق مولشەرلەمەنى ەكونوميكانىڭ ءوسۋىنىڭ ۇزاق مەرزىمدى الەۋەتتى قارقىنىمەن سالىستىرمالى دەڭگەيدە ۇستاپ تۇراتىن بولادى", - دەلىنگەن ءباسپاسوز حابارلاماسىندا.

بازالىق مولشەرلەمە بويىنشا شەشىم مىناداي فاكتورلار ەسكەرىلە وتىرىپ قابىلداندى:

• جىلدىق ينفلياتسيا 2017 جىلعى مامىردا نىسانالى ءدالىز شەڭبەرىندە 7,5% مولشەرىندە قالىپتاستى جانە ۇلتتىق بانكتىڭ باعالارىنا تولىعىمەن سايكەس كەلۋى;
• تەڭگە باعامىنىڭ اعىمداعى دەڭگەيدە ساقتالۋى بويىنشا تۇراقتى كۇتۋلەرى اياسىندا سالىمشىلاردىڭ ۆاليۋتالىق باسىمدىعىنىڭ وزگەرۋى;
• ەكونوميكاداعى ىسكەرلىك بەلسەندىلىك;
• اقشا-كرەديت تالاپتارى بازالىق مولشەرلەمە تومەندەگەننەن كەيىن قالىپتى-قاتاڭ دەڭگەيدەن بەيتاراپ دەڭگەيگە دەيىن جۇمسارۋى.

بازالىق مولشەرلەمە بويىنشا كەزەكتى شەشىم 2017 جىلعى 17 شىلدەدە استانا ۋاقىتى بويىنشا ساعات 17.00-دە جاريالاناتىن بولادى.

ايتا كەتەيىك، ۇلتتىق بانك بۇعان دەيىن بازالىق مولششەرلەمەنى 12%-دان 11%-عا دەيىن تومەندەتكەن. 2016 جىلى بۇل كورسەتكىش 17% دەڭگەيىندە بولعان.

“The Qazaq Times”