Putin AQŞ jariyalağan sankciyağa pısqırmay otır

Keşe, yağni, 30 jeltoqsan soltüstiktegi körşi eldiñ prezidenti V. Putin «Obama jariyalap otırğan sankciya» turalı «qaperine de almaytın» wstanımda twratının jariyaladı.

AQŞ-tıñ qızımetten kete qoymağan prezidenti Barak Obama qwrama ştattardağı prezident saylau isine aralastı degen ayıppen, 29 jeltoqsan küni reseylik Barlau jäne Qauipsizdik organdarı men joğarı lauazımdı twlğalarına qarata sankciya jariyalağan bolatın. Soğan say, otız bes Resey diplomatın elden şığaru men birge AQŞ-tağı Resey Sırtqı ister ministrliginiñ jıljımaytın mülikterine de tosqauıl qoyatın bolğan. Bwnıñ bwrınğı sankciyalardan ayırmaşılığı – Resey Sırtqı ister ministrligin ayıptap mälimdeme jasaumen şektelmey, qayta, birden naqtı äreketterge barıp otır.

Sankciya jariyalanğan küni är eldiñ aqparat qwraldarında bwğan qarsı Resey qanday şeşim qabıldaydı degen taqırıp talqıdana bastağan edi. Resey sırtqı ministri Sergey Lavrov V. Putinge: Obamanıñ talabı boyınşa diplomattardı şığarıp äketip, Resey Sırtqı ister ministrliginiñ twraqtı mülkin qaytaru turalı wsınıs aytqan edi. Alayda, Putin bwl wsınıstan bas tarttı. Dese de, AQŞ jariyalağan sankciyağa qarsı şaralar jasauğa da nwsqau bergen joq. Jauapkerşilikti öz moynına alatın sıñay tanıttı. Onımen qoymay, Putin Kreml'degi jaña jıldıq keşke  amerikalıq diplomattı şaqıratının ayttı.

Obamanıñ oyı, AQŞ-tıñ jaña saylanğan prezidenti Tramp pen amerikalıqtardıñ köñildi mereke ötkizui edi. Putinnıñ oğan mısqıldı kekesin aralasqan «jomart» ta , «jılı» jauap qatuı AQŞ aqparat älemine jasağan tosınsıymen birdey boldı. Tramptıñ taqqa otıruına qarsı közqarastağı keybir BAQ ökilderi Putinnıñ bwl şeşimin tapqırlıq dep «layk» bastı.

Putinnıñ bwl qadamı tañqalarlıq, tipti öreskel körinse de, şın mäninde orındı şeşim deuge de boladı. Sebebi, Obama Aqüyde otırğan segiz jılda AQŞ pen Resey qarım-qatınası bitpes dau-damayğa wlastı. Alayda, juıq arada Obama bilikten ketedi de, bir qarağanda Reseymen dostıq qatınasqa qwştar Tramp keledi. Bwl, ärine Resey üşin quanarlıq is. Obama jariyalağan sankciya Tramp pen Putin arasına sına qağu dep qarağan Resey jaq, onı eleusiz qaldıru arqılı, prezidenttik ornınan ketuge jaqın Obama ükimetine mısqıl jauap qatıp otır. Alayda, Tramptıñ taqqa otıruı Reseyge qanşalıq payda äkeledi,  ol jağı äli belgisiz.

"The Qazaq Times"