كورنەكى سۋرەت. فوتو: knews.kg

«نۇر وتان» پارتياسى 2021 جىلعا قاراي جۇزەگە اسىرىلۋى ءتيىس بىرقاتار سايلاۋالدى ۋادەلەرىن ورىنداعان جوق. بۇل تۋرالى ءماجىلىستىڭ ءباسپاسوز قىزمەتى حابارلادى.

ۇكىمەتتىڭ «قازاقستان-2021: بىرلىك. تۇراقتىلىق. جاسامپازدىق» دەپ اتالعان كەيبىر مىندەتتەمەلەر تولىق كولەمدە ورىندالماعان. مىسالى، نارىقتى وتاندىق ازىق-تۇلىكپەن، 250 ادامنان تۇراتىن بارلىق ەلدى مەكەندەردى جوعارى جىلدامدىقتى ينتەرنەتپەن قامتاماسىز ەتۋ، مەملەكەتتىك جانە كۆازيمەملەكەتتىك سەكتوردىڭ ءىرى كومپانيالارىن جەكەشەلەندىرۋ سىندى جوسپارلار «ادەتتەگىدەي» ءسوز كۇيىندە قالعان.

ءماجىلىس توراعاسى نۇرلان نىعماتۋلين: «پاندەميا، الەمدىك نارىقتارداعى تۇراقسىزدىق – ەسكەرىلۋى ءتيىس ماسەلەلەر. بىراق ءبىز ۇكىمەتتىڭ بۇل ماسەلەلەردى شەشۋدە ناقتى تەتىكتەرى مەن تۇسىنىكتەرى بار ەكەنىن كورىپ وتىرمىز. ۇكىمەت العا قويىلعان ماقساتتارعا قول جەتكىزۋ ءۇشىن بارلىق قاجەتتى كۇش-جىگەر مەن قۇرالداردى وسى باعىتتارعا شوعىرلاندىرادى دەپ ويلايمىن. پارلامەنت ءوز تاراپىنان باقىلاۋدى قامتاماسىز ەتۋدى جالعاستىرادى»، – دەيدى.

قازىر بۇل پارتيا الداعى سايلاۋعا قىزۋ دايىندىق باستاعان. وسك-نىڭ 5 قاراشاداعى شەشىمىنە ساي، قازاقستاننىڭ ەكس-پرەزيدەنتى، پرەزيدەنتتىكتەن كەتسە دە بيلىككە ىقپال ەتىپ وتىرعان نۇرسۇلتان نازارباەۆتىڭ «نۇر وتان» پارتياسى، بيلىككە جاقىن «اقجول»، «اۋىل»، «بىرلىك»، «قازاقستاننىڭ كوممۋنيستىك پارتياسى» جانە وزدەرىن وپپوزيتسيالىق پارتيامىز دەيتىن «جالپىۇلتتىق سوتسيال-دەموكراتيالىق پارتيا» سايلاۋعا قاتىسا الادى.

ءبىز ءسوز ەتىپ وتىرعان ءماجىلىس پەن ماسليحات سايلاۋىن قازىرگى پرەزيدەنت توقاەۆ 10 قاڭتارعا بەلگىلەگەن. بۇل – ەلدى وتىز جىلعا جۋىق باسقارعان بۇرىنعى پرەزيدەنت نۇرسۇلتان نازارباەۆتىڭ وتستاۆكاسىنان كەيىن العاش رەت وتەتىن ءماجىلىس سايلاۋى بولماق. 1995 جىلى جاڭا كونستيتۋتسيا قابىلدانعالى ۇنەمى كەزەكتەن تىس ءوتىپ كەلگەن سايلاۋ بۇل جولى زاڭدا بەلگىلەنگەن مەرزىمىندە وتپەك. ەلدە ءماجىلىس پەن ءماسليحات بەس جىلعا سايلانادى.

ەلدە بىلتىردان بەرى بيلىككە سىن ايتىپ، ساياسي رەفورما تالاپ ەتىپ جۇرگەن بىرنەشە باستاماشىل توپ پەن ساياسي ۇيىمدار پارتيا بولىپ تىركەلىپ، پارلامەنت سايلاۋىنا قاتىسۋدى جوسپارلاعان. بىراق ولار ءتۇرلى سەبەپپەن سايلاۋعا دەيىن تىركەلە المادى. ەكى ايداي قالعان سايلاۋعا دەيىن قانداي دا ءبىر ۇيىم جاڭا پارتيا بولىپ تىركەلۋى ەكىتالاي. قازاقستان زاڭى بويىنشا، ساياسي پارتيا بولىپ تىركەلۋ ءۇشىن 20 مىڭ مۇشەسى بولۋى شارت، مىڭداعان ادام قاتىسقان قۇرىلتاي وتكىزىپ، ءار ايماقتا فيليال اشىپ، ادىلەت مينيسترلىگىنە قۇجات تاپسىرۋى ءتيىس.

Cايلاۋعا دەيىن پارتيا تىركەگىسى كەلگەن بەلسەندىلەر «بيلىك وزىنە قارسى شىعاتىن ساياسي كۇشتەردى سايلاۋعا جىبەرمەدى، رەسمي تىركەۋدەن وتكىزبەدى»، «10 قاڭتاردا وتىرىك ءارى ءولى سايلاۋ بولادى» دەپ سانايدى.

ايتا كەتەيىك، 1999 جىلى مەرزىمىنەن بۇرىن وتكەن پرەزيدەنت سايلاۋىنان كەيىن كانديدات نۇرسۇلتان نازارباەۆتىڭ سايلاۋ شتابىنىڭ نەگىزىندە قۇرىلعان پارتيا ءوزىن حالىقتىق، دەموكراتيالىق پارتيا رەتىندە دارىپتەيدى. ءاۋ باستا «وتان» پارتياسى دەپ اتالعان ول مەملەكەتتىك ءانۇران اۋىسقان 2006 جىلى نازارباەۆ ەسىمىنىڭ العاشقى بۋىنى قوسىلىپ، اتاۋى «نۇر وتان» دەپ وزگەردى.

"The Qazaq Times"