اقش پرەزيدەنتى دونالد ترامپ. فوتو: kudago

اقش-تا افروامەريكالىق ازاماتتىڭ قازاسىنان كەيىن باستالعان قاقتىعىستار ءالى باسىلعان جوق. كوروناۆيرۋس دەندەگەن مەملەكەت ءۇشىن بۇل جاعداي «جىعىلعانعا جۇدىرىق» بولعانداي. ەلدەگى حال-احۋالدى ءجىتى باقىلاپ وتىرعان اق ءۇي باسشىسى دونالد ترامپ جاعدايدى رەتتەۋ ءۇشىن بۇلىك ورىن العان قالالارعا اسكەر جىبەرەتىنىن ايتتى. بۇل جايلى SkyNews جازدى.

كەشە شەرۋگە شىققاندار اق ءۇي الدىنا جينالىپ، بۇلىك شىعارعان. سوندىقتان دا پرەزيدەنت پەن ونىڭ ايەلى بۋنكەرگە جاسىرىندى. كەيىننەن پرەزيدەنت ەلدەگى جاعداي جايىندا مالىمدەمە جاسادى. ترامپ مالىمدەمەسىندە: «مەنىڭ اكىمشىلىگىم زورلىق-زومبىلىقتى توقتاتادى. امەريكاعا قۇلدىراۋ ەمەس، ورلەۋ قاجەت. قاستىق ەمەس، دوستىق كەرەك. بۇلىكتىڭ ورنىنا ءتارتىپ ورناۋى كەرەك»، – دەدى. سونىمەن قاتار بۇل ەرەۋىلدەردى ۇيىمداستىرعان «انتيفا» قوزعالىسىن تەررورلىق توپ تىزىمىنە ەنگىزەتىنىن ايتتى. الداعى ۋاقىتتا بۇلىكتى باسۋ ماقساتىندا ايماقتارعا اسكەرلەر جىبەرىلمەك. بىراق ترامپتىڭ سايلاۋداعى قارسىلاسى دجو بايدەن «قالالارعا اسكەر جىبەرۋ – امەريكا حالقىنا قارسى شىعۋ» دەيدى.

ۋاشينگتون مەرى ميۋريەل باۋزەر: «العاشىندا ەرەۋىلدەر بەيبىت تۇردە وتكەن. الايدا ارتىنشا تارتىپسىزدىكتەر بەلەڭ الدى. كوبى بۇعان الدىن الا دايىندالىپ كەلگەنگە ۇقسايدى. ماسەلەن، دۇكەندەردىڭ تەرەزە-ەسىگىن سىندىرۋ ءۇشىن ارنايى قۇرالدار الىپ كەلگەن. سوندىقتان بۇلىككە ۇيىمداسقان توپتاردىڭ قاتىسى بار ما دەگەن وي كەلەدى»، – دەيدى. كوپتەگەن ساراپشىلار امەريكادا بەيبىت تۇردە باستالعان شەرۋلەردىڭ ءىرى قاقتىعىستارعا ۇلاسۋىنا سىرتقى كۇشتەردىڭ، ءتىپتى رەسەيدىڭ ىقپالى بار دەپ سانايدى.

25 مامىردا ميننەاپوليس قالاسىندا 46 جاستاعى دجوردج فلويد پوليتسەي وكىلدەرىنىڭ كوز الدىندا جان تاپسىرعان. دۇكەن كاسسيرى مارقۇم جالعان بانكنوتپەن ەسەپ ايىرىسپاق بولدى دەگەن ۋاجبەن پوليتسيا شاقىرادى. ارتىنشا وقيعا ورنىنا كەلگەن ءتارتىپ ساقشىلارى كۇدىكتىنىڭ قولىنا كىسەن سالعاننان كەيىن وفيتسەرلەردىڭ ءبىرى ونىڭ جەلكەسىنەن اياعىمەن 7 مينۋتتاي باسىپ تۇرعان. داۋىسى قارلىققان افروامەريكالىق ءوزىنىڭ دەم الا الماي جاتقانىن ايتادى، بىراق وعان پوليتسەيلەر قۇلاق اسپاعان. وسىدان كەيىن «مەن تۇنشىعىپ قالدىم!» تىركەسى شەرۋدىڭ باستى ۇرانىنا اينالدى.

"The Qazaq Times"