قازاقستاندا كوۆيد جۇققاندار قاتارى كەيىنگى بەس ايدا العاش رەت مىڭنان ازايدى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى بەس ايدا العاش رەت مىڭنان كەمىپ، جالپى ەسەبى 1 ملن 31 مىڭعا جەتتى. بۇل سالىستىرمالى تۇردە بىلتىرعىدان ءبىرشاما جوعارى. قاراشا ايىندا 10 مىڭنان اسا ادام اۋىرىپ، 190 ادام قايتىس بولدى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 8 قاراشا كوروناۆيرۋس (كۆي+) جۇققان 909 ادام، ال 7-ءسى كوروناۆيرۋس پنەۆمونياسىنا (كۆي-) شالدىققان 16 ادام تىركەلدى. بۇدان كەيستەر سانى 20 ماۋسىمداعى دەڭگەيگە تومەندەگەنىن كورۋگە بولادى. سونداي-اق، جەكسەنبىدە 34 قازاقستاندىق اۋرۋدان قايتىس بولدى. بىلتىر ءدال وسى ۋاقىتتا رەسمي ستاتيستيكادا تاۋلىگىنە كوپ دەگەندە 650-گە دەيىن ناۋقاس جانە 5-6 ءولىم جاعدايى تىركەلەتىن، ءۇيى مەن اۋرۋحانادا جاتقان سىرقاتتار سانى 7 مىڭ شاماسىندا ەدى. قازىر بۇل كورسەتكىش ەسەلەپ ءوسىپ وتىر، بۇگىندە ەلدە 39 مىڭ ادام (كۆي+ بويىنشا 34 مىڭ، كۆي- بويىنشا 5 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار سانى تاعى كوبەيدى. ولاردىڭ نەگىزگى بولىگى نەمەسە 13%-ى ادەتتەگىدەي سقو (135), 13%-ى پاۆلودار (133) وبلىسىنا تيەسىلى. اۋرۋشاڭدىق  استانا (109), قاراعاندى (109), قوستاناي (83), الماتى قالاسى (79), اقمولا (76), اتىراۋ (9), شقو (50), جامبىل (15), بقو (10), قىزىلوردا (7), اقتوبە (4), ماڭعىستاۋ (3) وبلىستارىندا ەلەۋلى تۇردە كەمىدى. ال الماتى وبلىسى (61), شىمكەنت (16), تۇركىستان (10) وڭىرلەرىندە  بىرشاما ارتقان. دۇيسەنبىدە اۋرۋدان ايىققان 2 مىڭعا تارتا ادام ۇيىنە شىعارىلعان. 7 قاراشادا جيىنى 9 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قاراشانىڭ 7-ءسى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 16 ناۋقاس ەسەپكە الىندى. ۆەدومستۆو دەرەگىنشە, بۇل كۇنى شىمكەنت (9), ماڭعىستاۋ (4), الماتى وبلىسى (4), جامبىل (1), قوستانايدا (1) انىقتالعان. سونىمەن قوسا، 51 ادام ايىعىپ شىققان، تاعى 2 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 39 مىڭ ناۋقاستىڭ 7 مىڭى اۋرۋحانادا، 32 مىڭى امبۋلاتورلىق باقىلاۋدا. 520 ناۋقاستىڭ جاعدايى ناشار، ونداعى 144 ادامنىڭ ءحالى وتە اۋىر. بۇدان وزگە 110 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» شىمكەنت، اتىراۋ، تۇركىستان، ماڭعىستاۋ، بقو، شقو، الماتى وبلىسى، جامبىل، اقتوبە، قىزىلوردا وبلىستارىنان باسقا استانا، الماتى قالاسى، قاراعاندى جانە اقمولا وبلىسى «سارى ايماققا» وتكەن. باسقا 3 ايماق (قوستاناي، پاۆلودار، سقو) تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، ىندەت تاراعان 2020-2021 جىلدارى پتر تەستى وڭ كورسەتكەن 1407 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ وزىندە 99 مىڭداي ناۋقاس ەسەپكە الىنعان جانە 2117 ادام قايتىس بولعان. ال قازان ايىندا 57 مىڭ اۋرۋ جانە 1078 ءولىم جاعدايى تىركەلگەن. قاراشا ايى باستالعالى 10 مىڭنان اسا سىرقات تىركەلدى، دەرت مەڭدەگەن 190 شاقتى ادام ومىردەن وتكەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 950 مىڭنان، 1 تامىزدان بەرگى كوروناۆيرۋس پنەۆمونياسى 80 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 1 ملن 31 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميانىڭ باس-اياعى 20 ايىندا جالپى ۆيرۋس جۇققانداردان 20,7 مىڭ ادام (كۆي+ / U07.1 – 12 291, كۆي- / U07.2 – 5073, ىلەسپە اۋرۋلاردان – 3415) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 37-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 7,7 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 8,4 ملن-نان اسادى. دەنساۋلىق ساقتاۋ ءمينيسترى الەكسەي تسوي قاراشا ايىنىڭ ءۇشىنشى ونكۇندىگىنەن باستاپ ۆاكتسينا العانىنا جارتى جىل وتكەندەر ءۇشىن رەۆاكتسياناتسيا ناۋقانى جۇرگىزىلەتىنىن مالىمدەگەن.

The Qazaq Times