ءبىر كۇندە 53 قازا: قازاقستاندا كوۆيد جۇققاندار ازايا باستاعانىمەن، ءولىم كۇرت كوبەيدى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 1,4 مىڭعا ارتىپ، جالپى ەسەبى 997 مىڭنان اسقان. قازان ايىندا 34,5 مىڭ ناۋقاس انىقتالىپ، 669 ادام كوز جۇمعان. بۇل سالىستىرمالى تۇردە بىلتىرعىدان ايتارلىقتاي جوعارى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 18 قازاندا كوروناۆيرۋس (كۆي+) جۇققان 1387 ادام، ال 17-ءسى كۇنى  كوروناۆيرۋس پنەۆمونياسىنا (كۆي-) شالدىققان 9 ادام تىركەلدى. سونداي-اق، وتكەن جەكسەنبىدە 53 قازاقستاندىق اۋرۋدان قايتىس بولدى. وسىلايشا، اپتا باسىنداعى ەپيدكورسەتكىش 22 ماۋسىمداعى دەڭگەيگە تومەندەدى. دەگەنمەن بىلتىر ءدال وسى ۋاقىتتا رەسمي ستاتيستيكادا تاۋلىگىنە كوپ دەگەندە 300-گە دەيىن ناۋقاس جانە 10-عا جەتەر-جەتپەس ءولىم جاعدايى تىركەلەتىن، ستاتسيونارلاردا جاتقان سىرقاتتار سانى 3,5 مىڭنان اسپاعان ەدى. قازىر بۇل كورسەتكىش ەسەلەپ ءوسىپ وتىر، بۇگىندە ەلدە 52 مىڭ ادام (كۆي+ بويىنشا 45 مىڭ، كۆي- بويىنشا 6,5 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 19%-ى ادەتتەگىدەي جوعارى ديناميكادا تۇرعان ءبىر عانا الماتى (250) قالاسىنا تيەسىلى. ءبىر كۇندە تىركەلگەن ناۋقاستاردىڭ ۇشتەن ءبىر بولىگى استانا مەن الماتى قالاسىنا جاتادى. اۋرۋشاڭدىق استانا (149), پاۆلودار (159), قاراعاندى (148), سقو (128), قوستاناي (103), شقو (85), اتىراۋ (24), بقو (15), اقتوبە (15), تۇركىستان (7), قىزىلوردا (14), جامبىل (13) وبلىستارىندا تومەندەگەنى بايقالادى. تەك اقمولا (126), الماتى وبلىسى (111), شىمكەنت (33), ماڭعىستاۋ (7) وڭىرلەرىندە ازداپ ءوسىم بار. دۇيسەنبىدە اۋرۋدان ايىققان 1910 ادام ۇيىنە شىعارىلعان. 17 قازاندا جيىنى 46 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قازاننىڭ 17-ءسى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 9 ناۋقاس ەسەپكە الىندى. ۆەدومستۆو دەرەگىنشە, بۇل كۇنى شقو (5), اقمولا (2), قوستاناي (1) جانە استانادان (1) انىقتالعان. سونىمەن قوسا، 33 ادام ايىعىپ شىققان، تاعى 7 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 52 مىڭ ناۋقاستىڭ 9 مىڭى اۋرۋحانادا، 43 مىڭى امبۋلاتورلىق باقىلاۋدا. 627 ناۋقاستىڭ جاعدايى ناشار، ونداعى 168 ادامنىڭ ءحالى وتە اۋىر. بۇدان وزگە 96 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» شىمكەنت، تۇركىستان، اقتوبە، ماڭعىستاۋ، قىزىلوردا جانە جامبىل وبلىستارىنان باسقا قاراعاندى، بقو، شقو، الماتى، اتىراۋ وبلىستارى «سارى ايماققا» وتكەن. باسقا 5 ايماق تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، ىندەت تاراعان 2020-2021 جىلدارى پتر تەستى وڭ كورسەتكەن 1407 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ وزىندە 99 مىڭداي ناۋقاس ەسەپكە الىنعان جانە 2117 ادام قايتىس بولعان. ال قازان ايىندا 34,5 مىڭ اۋرۋ جانە 616 ءولىم جاعدايى تىركەلگەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 919 مىڭنان، 1 تامىزدان بەرگى كوروناۆيرۋس پنەۆمونياسى 78 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 997 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 19,8 مىڭ ادام (كۆي+ / U07.1 – 11 797, كۆي- / U07.2 – 4969, ىلەسپە اۋرۋلاردان – 3123) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 37-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 7,1 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 8 ملن-نان اسادى. دەنساۋلىق ساقتاۋ ءمينيسترى الەكسەي تسوي قاراشا ايىنىڭ ءۇشىنشى ونكۇندىگىنەن باستاپ ۆاكتسينا العانىنا جارتى جىل وتكەندەر ءۇشىن رەۆاكتسياناتسيا ناۋقانى جۇرگىزىلەتىنىن مالىمدەدى.

The Qazaq Times