قازاقستانداعى كوۆيد قارقىنى ءۇش اي بۇرىنعى جاعدايعا تومەندەدى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 1,9 مىڭعا ارتىپ، جالپى ەسەبى 954 مىڭنان استى. اياقتالۋىنا از كۇندەر قالعان قىركۇيەك ايىنىڭ وزىندە 90 مىڭنان اسا ادام اۋىرىپ، 1,9 مىڭعا جۋىق ادام كوز جۇمعان.

ءتورتىنشى تولقىن ەكپىندەي باستاعان شىلدە ايىنىڭ ورتاسىنا قاراي تاۋلىكتىك سىرقاتتار سانى 5 مىڭنىڭ، تامىزعا قاراي 7 مىڭنىڭ ۇستىنە شىققان، ىندەت قارقىنى كۇزدىڭ باسىندا 5 مىڭنان 3 مىڭ كەيسكە ماڭايلادى. كەشە توقساندىقتا العاش مارتە 2 مىڭنان كەم سىرقات تىركەلدى، بۇل وسىدان ءۇش اي بۇرىنعى، ياعني 28 ماۋسىمداعى احۋالعا پارا-پار. دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 26 قىركۇيەكتە كوروناۆيرۋس (كۆي+) جۇققان 1878 ادام، ال 25-ءى كۇنى  كوروناۆيرۋس پنەۆمونياسىنا (كۆي-) شالدىققان 32 ادام تىركەلدى جانە سەنبىدە 35 قازاقستاندىق اۋرۋدان قايتىس بولدى. قازىر ەلدە 63 مىڭ ادام (كۆي+ بويىنشا 53 مىڭ، كۆي- بويىنشا 8 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 25%-ى ادەتتەگىدەي جوعارى ديناميكادا تۇرعان ءبىر عانا الماتى (485) قالاسىنا تيەسىلى. ال استانا (186), قاراعاندى (184), پاۆلودار (164), الماتى (162), قوستاناي (104), اقمولا (96), شقو (95), سقو (71), اقتوبە (62), شىمكەنت (41), جامبىل (53), اتىراۋ (53), تۇركىستان (50), بقو (36),  قىزىلوردا (26), ماڭعىستاۋ (10) وڭىرلەرىندە ءبىرشاما تۇراقتى. جەكسەنبىدە اۋرۋدان ايىققان 2202 ادام ۇيىنە شىعارىلعان. 25 قىركۇيەكتە جيىنى 30 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قىركۇيەكتىڭ 25-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 32 ناۋقاس ەسەپكە الىندى. ۆەدومستۆو دەرەگىنشە، بۇل كۇنى الماتى وبلىسى (13), شقو (7), قاراعاندى (3), اقتوبە (3), استانادا (3) سىرقاتتار كوپتەپ انىقتالعان. سونىمەن قوسا، 111 ادام ايىعىپ شىققان، تاعى 5 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 63 مىڭ ناۋقاستىڭ 11,5 مىڭى اۋرۋحانادا، 52 مىڭى امبۋلاتورلىق باقىلاۋدا. 895 ناۋقاستىڭ جاعدايى ناشار، ونداعى 222 ادامنىڭ ءحالى وتە اۋىر. بۇدان وزگە 142 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» تۇركىستان، ماڭعىستاۋ، قىزىلوردا جانە جامبىل وبلىستارىنان باسقا شىمكەنت، اتىراۋ، اقتوبە، سقو، بقو، شقو، الماتى وبلىستارى «سارى ايماققا» وتكەن. باسقا 5 ايماق تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ ءتورت اپتاسىندا 90 مىڭنان اسا ناۋقاس ەسەپكە الىنعان جانە 1885 ادام قايتىس بولعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 879 مىڭعا جۋىقتاسا، 1 تامىزدان بەرگى كوروناۆيرۋس پنەۆمونياسى 75 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 954 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 19 مىڭعا تارتا ادام (كۆي+ / U07.1 – 11 065, كۆي- / U07.2 – 4800, ىلەسپە اۋرۋلاردان – 3123) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 36-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 6,4 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 7,5 ملن-نان اسادى.

The Qazaq Times