Балаларға арналған қалалық клиникалық жұқпалы аурулар ауруханасының модульді филиалындағы реанимация бөлімінде коронавируспен сырқаттанып жатқан науқас. 21 қыркүйек 2021 жыл. Алматы қаласы. Фото: QT / Күлтегін Аспанұлы

Қазақстанда коронавирус пен оған ұқсас пневмонияға шалдыққандар саны тағы 1,9 мыңға артып, жалпы есебі 954 мыңнан асты. Аяқталуына аз күндер қалған қыркүйек айының өзінде 90 мыңнан аса адам ауырып, 1,9 мыңға жуық адам көз жұмған.

Төртінші толқын екпіндей бастаған шілде айының ортасына қарай тәуліктік сырқаттар саны 5 мыңның, тамызға қарай 7 мыңның үстіне шыққан, індет қарқыны күздің басында 5 мыңнан 3 мың кейске маңайлады. Кеше тоқсандықта алғаш мәрте 2 мыңнан кем сырқат тіркелді, бұл осыдан үш ай бұрынғы, яғни 28 маусымдағы ахуалға пара-пар. Денсаулық сақтау министрлігінің ресми мәліметінше, елде 26 қыркүйекте коронавирус (КВИ+) жұққан 1878 адам, ал 25-і күні  коронавирус пневмониясына (КВИ-) шалдыққан 32 адам тіркелді және сенбіде 35 қазақстандық аурудан қайтыс болды. Қазір елде 63 мың адам (КВИ+ бойынша 53 мың, КВИ- бойынша 8 мың) ауырып жатыр.

#COVID Өткен күні ПТР тесті арқылы коронавирус жұққаны расталған науқастар қатары тағы артты. Олардың басым бөлігі немесе 25%-ы әдеттегідей жоғары динамикада тұрған бір ғана Алматы (485) қаласына тиесілі. Ал астана (186), Қарағанды (184), Павлодар (164), Алматы (162), Қостанай (104), Ақмола (96), ШҚО (95), СҚО (71), Ақтөбе (62), Шымкент (41), Жамбыл (53), Атырау (53), Түркістан (50), БҚО (36),  Қызылорда (26), Маңғыстау (10) өңірлерінде біршама тұрақты. Жексенбіде аурудан айыққан 2202 адам үйіне шығарылған. 25 қыркүйекте жиыны 30 адам қайтыс болған.

#COVID_пневмониясы механикалық әдіспен есепке алынатындықтан, демалыс күндері медстатистика жүйесі толық қамтылмайды. Салдарынан кейстер қатары сенбі және жексенбі, мереке күндері әдеттегіден айтарлықтай аз тіркеледі. Қыркүйектің 25-і ақпараты бір тәулікке кешігіп берілетін коронавирус пневмониясына шалдыққан 32 науқас есепке алынды. Ведомство дерегінше, бұл күні Алматы облысы (13), ШҚО (7), Қарағанды (3), Ақтөбе (3), астанада (3) сырқаттар көптеп анықталған. Сонымен қоса, 111 адам айығып шыққан, тағы 5 адам көз жұмған.

#Жалпы  ДенМин дерегіне қарағанда, емделіп жатқан 63 мың науқастың 11,5 мыңы ауруханада, 52 мыңы амбулаторлық бақылауда. 895 науқастың жағдайы нашар, ондағы 222 адамның хәлі өте ауыр. Бұдан өзге 142 сырқат өкпені жасанды желдету аппаратымен тыныстап жатыр.

Эпидкартада «жасыл аймақтағы» Түркістан, Маңғыстау, Қызылорда және Жамбыл облыстарынан басқа Шымкент, Атырау, Ақтөбе, СҚО, БҚО, ШҚО, Алматы облыстары «сары аймаққа» өткен. Басқа 5 аймақ тұтастай «қызыл аймақта» тұр.

ДенМиннің QT редакциясына берген мәліметінше, 11 наурыз бен 12 шілде аралығында ПТР тесті оң көрсеткен 1311 сынама секвенирленген (штамм түрін анықтайтын талдау). Сәйкесінше, биыл көктем-жазда геномдық зерттеу нәтижесінде елдің басым бөлігінен вирустың бразилиялық, британдық, оңтүстікафрикалық, үндістандық және нигериялық штамдары анықталған.

Биылғы жаз мезгілі қазақстандықтар үшін қаралы хабарға толы болды. Пандемия басталғалы 1,5 жылдың ішінде анықталған барлық аурушаңдық пен өлім жағдайының жартысы тек өткен жазда, төртінші толқында тіркелді. Жазғы үш айда бас-аяғы 420 мың адам ауырса, 6,6 мыңнан аса адам көз жұмды. Қыркүйек айының төрт аптасында 90 мыңнан аса науқас есепке алынған және 1885 адам қайтыс болған.

Былтыр 13 наурыздан бері COVID-19 инфекциясын жұқтырғандар қатары 879 мыңға жуықтаса, 1 тамыздан бергі коронавирус пневмониясы 75 мыңнан асқан. ДДСҰ дерекқоры мен Ұлттық статистикада Қазақстанда ауырғандар саны 954 мыңға жетті. Дегенмен Үкімет коронавирус пен оның пневмониясын екі бөлек есептейді.

Пандемия басталғалы жалпы вирус жұққандардан 19 мыңға тарта адам (КВИ+ / U07.1 – 11 065, КВИ- / U07.2 – 4800, ілеспе аурулардан – 3123) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінгендерді жалпы статистикаға енгізбейді. Бұған қарсы сарапшылардың сөзіне қарағанда, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

Қазақстан вирус таралуы бойынша әлемде Джонс Хопкинс университеті және ДДСҰ тізіміндегі 221 ел мен аймақтың арасында 36-орынға орнықты.

Үкіметтің соңғы дерегіне қарағанда, Қазақстанда 6,4 млн адам коронавирусқа қарсы вакцинаны толық алған, ал кемінде бірінші дозасы егілген жұрттың саны 7,5 млн-нан асады.

The Qazaq Times