قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 2,5 مىڭعا ارتىپ، جالپى ەسەبى 937 مىڭعا جۋىقتادى.

ءتورتىنشى تولقىن ەكپىندەي باستاعان شىلدە ايىنىڭ ورتاسىنا قاراي تاۋلىكتىك سىرقاتتار سانى 5 مىڭنىڭ، تامىزعا قاراي 7 مىڭنىڭ ۇستىنە شىققان، ىندەت قارقىنى ءۇش اپتادان بەرى 5 مىڭنان 3 مىڭ كەيسكە ماڭايلادى.  دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 19 قىركۇيەكتە كوروناۆيرۋس (كۆي+) جۇققان 2438 ادام، ال 18-ءى كۇنى  كوروناۆيرۋس پنەۆمونياسىنا (كۆي-) شالدىققان 67 ادام تىركەلدى جانە سەنبىدە 43 قازاقستاندىق اۋرۋدان قايتىس بولدى. قازىر ەلدە 70 مىڭ ادام (كۆي+ بويىنشا 61 مىڭ، كۆي- بويىنشا 8,5 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى نەمەسە 20%-ى ادەتتەگىدەي جوعارى ديناميكادا تۇرعان ءبىر عانا الماتى (506) قالاسىنا تيەسىلى. ال قاراعاندى (340), استانا (299), الماتى (166), پاۆلودار (192), اقمولا (135), قوستاناي (115), شقو (115), اقتوبە (106), شىمكەنت (81), اتىراۋ (75), سقو (72), بقو (67), تۇركىستان (58), جامبىل (56), قىزىلوردا (41), ماڭعىستاۋ (14) وڭىرلەرىندە دەرت قارقىنى تۇراقتى، كەيبىرىندە سىرقاتتار قاتارى ءبىرشاما ارتقانى بايقالادى. سارسەنبىدە اۋرۋدان ايىققان 2944 ادام ۇيىنە شىعارىلعان. 18 قىركۇيەكتە جيىنى 37 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قىركۇيەكتىڭ 18-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 67 ناۋقاس ەسەپكە الىندى. ۆەدومستۆو دەرەگىنشە، بۇل كۇنى سىرقاتتار شىمكەنت (22), الماتى وبلىسى (9), قوستاناي (7), قاراعاندى (5) وڭىرىندە كوپتەپ انىقتالعان. سونىمەن قوسا، 13 ادام ايىعىپ شىققان، تاعى 6 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 70 مىڭ ناۋقاستىڭ 13 مىڭى اۋرۋحانادا، 57 مىڭدايى امبۋلاتورلىق باقىلاۋدا. 1051 ناۋقاستىڭ جاعدايى ناشار، ونداعى 278 ادامنىڭ ءحالى وتە اۋىر. بۇدان وزگە 143 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» تۇركىستان جانە جامبىل وبلىستارىنان باسقا شقو، سقو، بقو، جامبىل، قىزىلوردا، ماڭعىستاۋ وڭىرلەرى مەن شىمكەنتتە «سارى ايماققا» وتكەن. باسقا 8 ايماق (استانا، الماتى قالاسى، اقمولا، اقتوبە، اتىراۋ، قاراعاندى، قوستاناي، پاۆلودار وبلىستارى) ءالى دە «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. كۇزدىڭ العاشقى جارتى ايىندا 61 مىڭداي ناۋقاس ەسەپكە الىنعان جانە 1275 ادام قايتىس بولعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 862 مىڭنان، 1 تامىزدان بەرگى كوروناۆيرۋس پنەۆمونياسى 74 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 937 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 18,6 مىڭنان اسا ادام (كۆي+ / U07.1 – 10 763, كۆي- / U07.2 – 4740, ىلەسپە اۋرۋلاردان – 3123) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 36-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 6,1 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 7,3 ملن-نان اسادى.

The Qazaq Time