جامبىلداعى جارىلىستان اۋىر جارالانعان كاپيتان كوز جۇمدى

جامبىل وبلىسى بايزاق اۋدانىنداعى اسكەري قويمادا بولعان جارىلىستان قاتتى جارالانىپ، جانساقتاۋ بولىمىندە جاتقان تاعى ءبىر اسكەري قىزمەتكەر كوز جۇمدى.

بۇل جونىندە 7 قىركۇيەكتە قورعانىس مينيسترلىگى رەسمي اقپارات تاراتتى.

«7 قىركۇيەكتە تاراز قالالىق اۋرۋحاناسىندا 26 تامىزدا جامبىل وبلىسىنداعى وق-دارىلەر قويماسىندا بولعان ءورتتى ءسوندىرۋ كەزىندە العان جاراقاتتارىنىڭ سالدارىنان №28349 اسكەري ءبولىمىنىڭ اسكەري قىزمەتشىسى 1983 جىلى تۋعان، كاپيتان ەرلان رىسقۇلبەكۇلى قىرعىزاليەۆ قايتىس بولدى. ول وق-دارىلەردى ساقتاۋ ءبولىمىنىڭ باستىعى لاۋازىمىن اتقارعان بولاتىن. قويماداعى ءورتتى جويۋعا كىرىسكەن العاشقىلاردىڭ ءبىرى بولدى» دەلىنگەن مينيسترلىك حابارلاماسىندا.

جامبىل وبلىسى بايزاق اۋدانىنداعى №28349 اسكەري بولىمىندە بولعان جويقىن جارىلىستان جاراقاتتانعان ءجۇز شاقتى ادامنىڭ ىشىندە جاعدايى ەڭ اۋىر كۇيدە قالالىق اۋرۋحاناعا ورنالاستىرىلعان. وسىعان دەيىن ءبولىم باستىعى كاپيتان ەرلان قىرعىزاليەۆتىڭ تۋىستارى استانا دارىگەرلەرىنىڭ كەلىپ كومەكتەسۋىن سۇراعان.

دەنەسىن 85%-ىن كۇيىك شالعان ءارى اپات سالدارىنان ەكىجاقتى پنەۆمونياعا شالدىققان اسكەري قىزمەتكەر ەكى اپتاعا جۋىق ۋاقىت رەانيماتسيادا جاتتى.

كاپيتان ەرلان قىرعىزاليەۆ. فوتو: قر قم

38 جاسىندا قايتقان مارقۇمنىڭ ارتىندا جولداسى مەن ءتورت بالاسى قالدى. پەرزەنتتەرىنىڭ الدى 13, كەنجەسى 2,5 جاستا. بايزاق اۋدانى سارىكەمەر ەلدى مەكەنىندە تۇرعان. وسىعان تاياۋ قاينار اۋىلىنىڭ تۇبىندەگى اسكەري بولىمگە بىلتىر عانا قىزمەتكە ورنالاسقان. وعان دەيىن اقتاۋ قالاسىندا كەلىسىمشارت نەگىزىندە 5 جىل اسكەري قىزمەتتە بولعان. جارىلىستان كەيىن كاپيتاننىڭ وتباسىنا ەشكىم حابارلاسپاعان.

وسىلايشا جامبىل وبلىسىنداعى جارىلىستان قازا بولعاندار 16 ادامعا جەتتى. قازىر جوعالعان تاعى ءبىر قىزمەتكەر – 33 جاستاعى باۋىرجان داۋىتباەۆتى ىزدەۋ جالعاسىپ جاتىر.

26 تامىزدا جامبىل وبلىسى بايزاق اۋدانىنداعى اسكەري بولىمدە بولعان جويقىن جارىلىستان 113 وق-ءدارى قويماسىنىڭ تەك ۇشەۋى ءبۇتىن قالعان. تەك قورعانىس نىسانى عانا ەمەس، اسكەري ءبولىمنىڭ تۇبىندە ورنالاسقان قاينار اۋىلى مەن جاقىن ماڭايداعى وزگە ەلدى مەكەندەردەن 106 تۇرعىن ءۇي، قوعامدىق ورىن سانالاتىن 18 عيمارات بۇلىنگەن. ەكى جىلدىڭ ىشىندە ەكىنشى مارتە قايتالانعان اپاتتان ءجۇز شاقتى ادام ءتۇرلى دەڭگەيدە جارالانىپ، سول كۇنى بىرنەشە مىڭ تۇرعىن بوسىپ، ەۆاكۋاتسيالانۋعا ءماجبۇر بولدى.

QT رەداكتسياسى توتەنشە جاعدايدان زارداپ شەگىپ قايتىس بولعانداردىڭ وتباسى مەن جاقىندارىنا قايعىرىپ كوڭىل ايتادى.

The Qazaq Times