جاڭاوزەندە تاعى ءۇش كومپانيانىڭ جۇمىسشىلارى ەرەۋىلدەتىپ جاتىر

21 شىلدەدە جاڭاوزەن قالاسىندا تاعى ءۇش مەكەمە جۇمىسشىلارى ەرەۋىلگە شىقتى. ولاردىڭ دا تالابى – ەڭبەك جاعدايىن جاقسارتىپ، جالاقىنى كوتەرۋ. قازىر جاڭاوزەندە ەرەۋىلدەپ تۇرعان مەكەمە سانى – التاۋ. بۇل جايلى ازاتتىق راديوسى حابارلادى. 

سايت اقپاراتىنا قاراعاندا، 21 شىلدەدە مەملەكەتتىك "وزەنمۇنايگاز" كومپانياسىنىڭ مۇناي-گاز ءوندىرۋ باسقارماسىنا ەدەن جۋىپ، ۆاحتەرلىق قىزمەت كورسەتەتىن نبكس مەكەمەسىنىڭ جۇمىسشىلارى جۇمىستى توقتاتقان. وندا جۇمىس ىستەيتىن كوپ بالالى، جالعىزباستى جانە مۇگەدەك بالا تاربيەلەپ وتىرعان ايەلدەر الەۋمەتتىك جەلىدە ۆيدەومالىمدەمە جاساپ، جۇمىس جاعدايىنىڭ ناشارلىعىنا شاعىمداندى.

"جۇمىسشىلار "وزەنمۇنايگازدىڭ" قۇرىلىمدىق مەكمەلەرىندەگى وندىرىستە جۇمىس ىستەيدى. تۇسكى اس ىشۋگە قالاعا كەلۋگە مۇمكىندىگى جوق. مۇنايشىلارمەن بىرگە زياندى رادياتسيا جۇتىپ جۇمىس ىستەيمىز، بىراق ول ءۇشىن نە تۇسكى اس، نە ءسۇت بەرىلمەيدى، زياندىلىق كوەففيتسيەنتى دە قاراستىرىلماعان. وڭىردە ازىق-تۇلىك قىمبات بولعاندىقتان، الاتىن ايلىق كۇنكورىسكە ارەڭ جەتەدى. بالا-شاعانى مەكتەپكە دايىنداۋ، كيىندىرۋ جانە باسقا تۇرمىستىق شىعىنداردى وتەۋ قيىندىق تۋدىرىپ، جالعىزباستى انالار جەتىسپەۋشىلىك تاۋقىمەتىن تارتىپ وتىر" دەپ مالىمدەدى ۆيدەودا ەرەۋىلشىلەر اتىنان سويلەگەن ايەل.

ولار جۇمىس بەرۋشىدەن جالاقىنى ەكى ەسە كوبەيتىپ، زياندى جۇمىس ءۇشىن قوسىمشا اقى تولەۋدى، ەڭبەك دەمالىسىنا اقشانى كوبەيتۋدى، زاڭدى مەرەكەلەردە سىياقى مەن ەمگە اقشا تولەۋدى، تۇسكى اسپەن قامتاماسىز ەتىپ، ماتەريالدىق كومەك كورسەتۋدى تالاپ ەتەدى.

جاڭاوزەندەگى وilfield equipment and services جانە "اقتاۋ مۇناي سەرۆيس كومپانياسى" جاۋاپكەرشىلىگ شەكتەۋلى سەرىكتەستىكتەرى جۇمىسشىلارى دا جۇمىستى توقتاتتى.

ولار بىرلەسىپ، جۇمىس بەرۋىشىنىڭ اتىنا سەگىز ۇجىمدىق تالاپ جولداعان. وندا:

• جەكە ەڭبەك شارتىن جاساۋدى
• ۇجىمدىق شارت جاساسۋدى
• ەڭبەكاقىنى 100 پايىز كوتەرۋدى
• مۇنايشىلار جانە تاۋەلسىزدىك مەرەكەسىنە سىياقى تولەۋدى
• ايماقتىق، سالالىق كوەففيتسيەنت تولەۋدى
• جىل سوڭىندا 13-جالاقى تولەۋدى
• كاسىپوداقتى قۋدالاۋدى توقتاتۋدى
• جۇمىستان شىعارىلعان كاسىپوداق مۇشەلەرى مەن توراعاسىن جۇمىسقا كەرى الۋدى تالاپ ەتەدى.

جاڭاوزەندەگى "اقتاۋ مۇناي سەرۆيس كومپانياسى" جۇمىسشىلارى تالابىن كومپانيانىڭ سولتۇستىك بۇزاششى، قالامقاس كەنىشتەرى مەن جەتىبايداعى فيليالدارى جۇمىسشىلارى دا قولداپ، جۇمىستى توقتاتتى دەدى.

جاڭاوزەندە Kunan holding جاۋاپكەرشىلىگى شەكەتۋلى سەرىكتەستىگى جۇرگىزۋشىلەرىنىڭ 19 شىلدەدە باستالعان ەرەۋىلى الى جالعاسىپ جاتىر. مەكەمەدە ون جىلدان بەرى جۇرگىزۋشى بولىپ جۇمىس ىستەيتىن باقتىعالي ءسابيوۆتىڭ ايتۋىنشا، مەكەمە باسشىلىعى جۇرگىزۋشىلەر تالابىن ورىنداۋدىڭ ورىنىنا 60 ادامدى جۇمىستان قىسقارتقان.

جاڭاوزەندەگى "باتىسگەوفيزسەرۆيس" بەن "مۇنايسپەتسسناب كومپاني" جۇمىسشىلارىنىڭ تالابى دا ورىندالماي، ەرەۋىل ءبىراز كۇننەن بەرى جالعاسىپ جاتىر. جۇمىسشىلار جالاقىنى ءوسىرۋدى، اقىلى ەڭبەك دەمالىسىن زاڭدى تۇردە كەستە بويىنشا ناقتى بەكىتىپ، ەرەۋىلدەگەن جۇمىسشىلاردى قۋدالاماۋدى تالاپ ەتكەن.

"The Qazaq Times"