الماتى قالاسىنداعى ورتالىق كلينيكالىق اۋرۋحاناسىنىڭ جانساقتاۋ بولىمىندە كوروناۆيرۋستىڭ اسقىنعان تۇرىمەن اۋىرىپ جاتقان ناۋقاستار. 15 شىلدە 2021 جىل. فوتو: QT / كۇلتەگىن اسپانۇلى

ءبىر اپتادان اسا ۋاقىت تاۋلىگىنە 5 مىڭنان اسا كەيستەن انىقتالىپ جاتقان قازاقستاندا كوروناۆيرۋس پەن وسى تەكتەس پنەۆمونياعا شالدىققاندار سانى تاعى 5742 ادامعا كوبەيدى. ءتورتىنشى تولقىن ۇدەگەن شىلدە ايىنىڭ العاشقى ەكى دەكاداسىندا 86 مىڭنان استام سىرقات تىركەلىپ ۇلگەردى. ءولىم كورسەتكىشى دە ۇدەپ تۇر.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 21 شىلدەدە كوروناۆيرۋس (كۆي+) جۇققان 5708 ادام، ال 20-سى كوروناۆيرۋس پنەۆمونياسىنا (كۆي-) شالدىققان 34 ادام تىركەلدى. قازىر ەلدە 67 مىڭ ادام (كۆي+ بويىنشا 65 808, كۆي- بويىنشا 1667) اۋىرىپ جاتىر.

#COVID  وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي استانا (1369),  الماتى قالاسى (993) جانە قاراعاندى وبلىسىندا (698) تىركەلدى. بۇدان وزگە شىمكەنت (418), اتىراۋ (386), ماڭعىستاۋ (207), پاۆلودار (197), اقتوبە (192), اقمولا (186), الماتى (178), بقو (170), قوستاناي (149), قىزىلوردا (139),  تۇركىستان (123) وبلىستارىندا دەرت ۇدەپ تۇر. وتكەن تاۋلىكتە 2487 ادام ايىعىپ ۇيىنە شىعارىلعان. سەيسەنبىدە جيىنى 64 ادام قايتىس بولعان.

#COVID_پنەۆمونياسى 20 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 34 ناۋقاس ەسەپكە الىندى. ۆەدومستۆو دەرەگىنشە، سىرقاتتار استانا (9), شىمكەنت (9) قالالارىندا، شقو-دا (5) كوپتەپ انىقتالعان. سونىمەن قوسا، 70 ادام ايىعىپ شىققان، تاعى 13 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 67 مىڭنان اسا ناۋقاستىڭ 20,5 مىڭى اۋرۋحانادا، 47 مىڭدايى امبۋلاتورلىق باقىلاۋدا. 1190 ناۋقاستىڭ جاعدايى ناشار، ونداعى 272 ادامنىڭ ءحالى وتە اۋىر. بۇدان وزگە 168 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ۆيرۋستىڭ تارالۋ قاتەرى جاعىنان رەسپۋبليكانىڭ بارلىق ءوڭىرى سارعايىپ-قىزارا ءتۇستى. «قىزىل ايماققا» ەنگەن وڭىرلەر: استانا، الماتى، شىمكەنت قالالارى مەن الماتى، اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، قىزىلوردا، سقو، پاۆلودار، جامبىل وبلىستارى. ال وزگە شقو جانە تۇركىستان وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 510 مىڭعا، 1 تامىزدان بىلايعى كوروناۆيرۋس پنەۆمونياسى 59 مىڭعا جۋىقتادى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 569 مىڭعا شامالادى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 11 122 ادام (كۆي+ / U07.1 – 5180, كۆي- / U07.2 – 3575, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 42-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 992 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"