الماتى قالاسىنداعى ورتالىق كلينيكالىق اۋرۋحاناسىنىڭ جانساقتاۋ بولىمىندە كوروناۆيرۋستىڭ اسقىنعان تۇرىمەن اۋىرىپ جاتقان ناۋقاس. 15 شىلدە 2021 جىل. فوتو: QT / كۇلتەگىن اسپانۇلى

ءبىر اپتادان بەرى تاۋلىگىنە 5 مىڭنان اسا كەيستەن انىقتالىپ جاتقان قازاقستاندا كوروناۆيرۋس پەن وسى تەكتەس پنەۆمونياعا شالدىققاندار سانى تاعى 5406 ادامعا ارتتى. ءتورتىنشى تولقىن ۇدەگەن شىلدە ايىنىڭ العاشقى ەكى دەكاداسىندا 80 411 سىرقات تىركەلىپ ۇلگەردى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 20 شىلدەدە كوروناۆيرۋس (كۆي+) جۇققان 5179 ادام، ال 19-ى كوروناۆيرۋس پنەۆمونياسىنا (كۆي-) شالدىققان 227 ادام تىركەلدى. قازىر ەلدە 64 مىڭ ادام (كۆي+ بويىنشا 62 651, كۆي- بويىنشا 1716) اۋىرىپ جاتىر.

#COVID مەرەكەلىك دەمالىس كۇنىنە قاراماستان، پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي استانا (1277),  الماتى قالاسى (710) جانە قاراعاندى وبلىسىندا (703) تىركەلدى. بۇدان وزگە شىمكەنت (412), اتىراۋ (348), بقو (272),  پاۆلودار (185), اقمولا (177), الماتى (160), ماڭعىستاۋ (146), اقتوبە (142), قوستاناي (141), قىزىلوردا (108), جامبىل (105), تۇركىستان (103) وبلىستارىندا دەرت ۇدەپ تۇر. وتكەن تاۋلىكتە 2529 ادام ايىعىپ ۇيىنە شىعارىلعان. دۇيسەنبىدە جيىنى 54 ادام قايتىس بولعان.

#COVID_پنەۆمونياسى 19 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 227 ناۋقاس ەسەپكە الىندى. ۆەدومستۆو دەرەگىنشە، سىرقاتتار اتىراۋ وبلىسى (35), استانا (31), ماڭعىستاۋ (27), الماتى وبلىسى (19),  جامبىل (18), شىمكەنت (15) قالاسىندا كوپتەپ انىقتالعان. سونىمەن قوسا، 75 ادام ايىعىپ شىققان، تاعى 8 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 64 مىڭنان اسا ناۋقاستىڭ 20 مىڭى اۋرۋحانادا، 44 مىڭى امبۋلاتورلىق باقىلاۋدا. 1157 ناۋقاستىڭ جاعدايى ناشار، ونداعى 263 ادامنىڭ ءحالى وتە اۋىر. بۇدان وزگە 160 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ۆيرۋستىڭ تارالۋ قاتەرى جاعىنان رەسپۋبليكانىڭ بارلىق ءوڭىرى سارعايىپ-قىزارا ءتۇستى. «قىزىل ايماققا» ەنگەن وڭىرلەر: استانا، الماتى، شىمكەنت قالالارى مەن الماتى، اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، قىزىلوردا، سقو، پاۆلودار، جامبىل وبلىستارى. ال وزگە شقو جانە تۇركىستان وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 504 مىڭنان، 1 تامىزدان بىلايعى كوروناۆيرۋس پنەۆمونياسى 58 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 563 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 11 045 ادام (كۆي+ / U07.1 – 5116, كۆي- / U07.2 – 3562, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 43-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 907 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"