اقش پرەزيدەنتى دجو بايدەن مەن گەرمانيا كانتسلەرى انگەلا مەركەل «ۋاشينگتون دەكلاراتسياسىنا» قول قويدى.

تاراپتار «سولتۇستىك اعىن-2» جوباسىنا دا ارنايى توقتالدى. ەكى ەل باسشىسى اتالعان جوبا بويىنشا ۋكراينا گاز ءدالىزى رەتىندەگى مارتەبەسىن ساقتاۋى كەرەك دەپ، رەسەيگە ەنەرگەتيكانى قارۋ قۇرالى رەتىندە پايدالانۋعا جول بەرمەيتىنىن كەسىپ ايتتى.

ۋاشينگتوندا وتكەن جيىندا اقش پرەزيدەنتى دجو بايدەن: «سولتۇستىك اعىن-2» جوباسى بويىنشا مەنىڭ ۇستانىمىم بۇرىننان بەلگىلى. جاقسى دوستارىمنىڭ كوزقاراسى بولەك بولۋى مۇمكىن. گاز قۇبىرىنىڭ قۇرىلىسى 90%-عا دەيىن سالىنعان بولاتىن. سوندىقتان سانكتسيالار ەنگىزۋدىڭ ەش ءمانى بولمادى»، – دەدى.

اق ءۇي باسشىسىنىڭ ايتۋىنشا، بۇل قۇجات ەكى ەلدىڭ دەموكراتيالىق قاعيدالاردى بەرىك ۇستاناتىنىن بەكىتەدى. وندا گفر مەن اقش ناتو-نى ەۋروپانىڭ قاۋىپسىزدىگىن قامتاماسىز ەتۋگە باعىتتالعان اسكەري ۇيىم دەپ ەسەپتەيدى. سونداي-اق تاراپتار ەكونوميكالىق جانە عىلىمي-تەحنيكالىق ىنتىماقتاستىقتى بىرلەسە دامىتۋعا ۋاعدالاستى.

«سولتۇستىك اعىن-2» قۇبىرى رەسەيدە وندىرىلگەن تابيعي گازدى ۋكراينا مەن پولشا جەرىنەن اينالىپ ءوتىپ، بالتىق تەڭىزىنىڭ تابانى ارقىلى باتىس ەۋروپاعا جەتكىزۋگە ارنالعان.

ۋاشينگتون مەن شىعىس ەۋروپا ەلدەرىنىڭ كوپشىلىگى رەسەيدەن گەرمانياعا تىكەلەي تاسىمالداناتىن گاز كولەمىن ەكى ەسە ارتتىرۋعا ارنالعان «سولتۇستىك اعىن–2» قۇبىر جوباسى باتىس ەۋروپانى رەسەيدىڭ تابيعي ەنەرگيا رەسۋرستارىنا تاۋەلدىلىگىن بۇرىنعىدان دا كۇشەيتە تۇسەدى دەپ قاۋىپتەنەدى.

"The Qazaq Times"