فوتو: s0.rbk

ەۋروپانىڭ بىرقاتار ەلدەرىندە كارانتين شەكتەۋلەرى جەڭىلدەتىلىپ, قالىپتى ومىرگە كوشە باستادى.

ۇلىبريتانيانىڭ لوندون قالاسىندا مەيرامحانا، بوۋلينگ، كينوتەاتر مەن تەاترلار جۇمىسىن قايتا باستادى. سونىمەن قاتار الەمگە تانىمال «لوندون كوزى» الىپ دوڭگەلەگى دە اشىلدى. قاۋىپسىزدىك ەرەجەلەرىنە سايكەس مادەنە ورىندارعا كەلگەن كورەرمەندەردىڭ سانىنا شەكتەۋ قويىلعان. قوعامدىق تاماقتانۋ ورىندارىندا دا الەۋمەتتىك اراقاشىقتىق ساقتالۋ كەرەك. دەگەنمەن، انگلياداعى قوعامدىق ورىندار اشىلسا دا، شوتلانديا، ۋەلس پەن سولتۇستىك يرلانيادا كارانتيندىك تالاپتار مامىردىڭ سوڭىنا دەيىن جەڭىلدەمەيدى.

ال فرانتسيادا بۇگىننەن باستاپ كافە مەن مەيرامحانالاردىڭ جازعى الاڭدارى، دۇكەندەر مەن مۇراجايلار اشىلدى. كينوتەاترلار مەن تەاترلار دا شەكتەۋلى مولشەردە كورەرمەندەردى جيناي الادى. ستاديوندار، كونتسەرت زالدارى مەن ديسكوتەكالار ءالى كۇنگە دەيىن جابىق. بارلىق نىسان تەك ساعات كەشكى توعىزعا دەيىن جۇمىس ىستەيدى. وسىدان كەيىن كومەندانتتىق ساعات كۇشىنە ەنەدى.

ۇكىمەت ەكى اپتادان كەيىن تاعى دا بىرقاتار شەكتەۋلەردى الىپ تاستاۋدى كوزدەپ وتىر. قازىر ەلدە كۇن سايىن كوروناۆيرۋستى جۇقتىرۋدىڭ 17-18 مىڭ دەرەگى تىركەلىپ جاتىر. فرانتسيا حالقىنىڭ شامامان ۇشتەن ءبىر بولىگى ۆاكتسينانىڭ ءبىر ەكپەسىن سالدىرعان. العاشقىلاردىڭ ءبىرى بولىپ شەكتەۋلەردىڭ جەڭىلدەتىلۋىن فرانتسيا پرەزيدەنتى ەممانۋەل ماكرون مەن ەل پرەمەر-ءمينيسترى جان كاستەكس اتاپ ءوتتى.

يتاليا بيلىگى ۇلىبريتانيا، يزرايل مەن ەۋرووداق ەلدەرىنەن كەلگەن دەمالۋشىلارعا قاتىستى 5 كۇندىك كارانتيندى الىپ تاستادى. بۇل شارا جازعى تۋريستىك ماۋسىمدى قولداۋ ماقساتىندا قولعا الىنىپ وتىر. دەسە دە، اقش، بىرىككەن اراب امىرلىكتەرى، كانادا مەن جاپونيا ازاماتتارى يتاليا اۋماعىنا ەنۋى ءۇشىن تەرىس ناتيجەلى پتر تەست ۇسىنۋى كەرەك.

وسى اپتادان باستاپ پورتۋگاليا ەۋروپانىڭ ءبىراز ەلىنە شەكاراسىن اشىپ، تۋريستەردى قابىلداي باستادى. ال كەلەسى اپتادا چەرنوگوريا الەمنىڭ بارلىق ەلدەرىنەن ساياحاتشىلار قابىلداي باستايدى. ال كەيبىر مەملەكەتتەر كەرىسىنشە شەكاراسىنداعى باقىلاۋدى كۇشەيتۋگە ءماجبۇر. ماسەلەن، تۋريستەر اراسىندا تانىمال مالديۆ ارالى وڭتۇستىك ازيا مەملەكەتتەرىنەن ەشكىمدى ىشكە كىرگىزبەيدى. ويتكەنى مۇندا ۆيرۋستىڭ قوس مۋتاتسياعا ۇشىراعان ۇندىستاندىق شتامى انىقتالعان.

امەريكالىق دجونس حوپكينس ۋنيۆەرسيتەتىنىڭ مالىمەتى بويىنشا، الەمدە كوروناۆيرۋس جۇقتىرعاندار 163 ملن 913 مىڭ ادامعا جەتكەن. 3 ملن 417 مىڭ ادام ۆيرۋستان قايتىس بولعان.

"The Qazaq Times"