كوكتەم تۋعالى 101 مىڭ ناۋقاس تىركەلدى. پاندەميا كەزىندە 6 مىڭ ادام كوز جۇمدى

كوكتەم تۋعالى قازاقستاندا 101 مىڭنان اسا سىرقات تىركەلىپ ۇلگەردى. رەسپۋبليكانىڭ ءۇشىنشى تولقىندا قىزىل ايماققا وتكەنىنە اي تاقادى. كۇندەلىكتى انىقتالىپ جاتقان ناۋقاستار سانى ەكى مىڭنان، ال ءولىم جاعدايى 20-دان ازايار ەمەس. بۇل پاندەميا كەزىندەگى ەڭ اۋىر كورسەتكىش. سالدارىنان قازاقستان الەمدە ەڭ كوپ ادام اۋىرعان ەلدەر قاتارىندا ءبىر ساتىعا كوتەرىلىپ، 47-ورىنعا ورنالاستى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 26 ءساۋىر كوروناۆيرۋس جۇققان 2284 ادام، ال 25-ءى كۇنى كوروناۆيرۋس پنەۆمونياسىنا شالدىققان 12 ادام تىركەلدى. قازىر ەلدە 42 مىڭنان اسا ادام (U07.1 نەمەسە كۆي+ بويىنشا 41 861, U07.2 نەمەسە كۆي- بويىنشا 399) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي الماتى قالاسى (689) مەن استانادا (294) تىركەلدى. بۇدان وزگە  الماتى وبلىسى (264), قاراعاندى (250), اقمولا (146) جانە پاۆلودار (87) وڭىرلەرىندە دەرت دەندەپ تۇر. وتكەن تاۋلىكتە اۋرۋدان ايىققان 2494 ادام ۇيىنە جىبەرىلگەن. بۇدان وزگە جەكسەنبىدە جيىنى 29 ادام قايتىس بولعان.

#COVID_پنەۆمونياسى 25 ءساۋىر اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 12 ناۋقاس ەسەپكە الىندى. ۆەدومستۆو دەرەگىنشە، تۇركىستان (4), شقو (2), الماتى وبلىسى مەن قالاسى (ارقايسى ەكى-ەكىدەن), اتىراۋ وبلىسى مەن الماتى قالاسىندا (ارقايسىندا ون-وننان) كوپتەپ تىركەلگەن. سونىمەن قوسا، 55 ادام ايىعىپ شىققان، تاعى 7 ادام كوز جۇمعان.

#جالپى  دەنمين-ءنىڭ رەسمي مالىمەتىنشە، ەمدەلىپ جاتقان 42 260 ناۋقاستىڭ 15 مىڭدايى اۋرۋحانادا، 27 مىڭى امبۋلاتورلىق باقىلاۋدا. احۋالى ناشار 756 ناۋقاستىڭ جاعدايى قيىن، ونداعى 179 ادامنىڭ ءحالى وتە اۋىر. بۇدان وزگە 110 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان سقو مەن تۇركىستان وبلىسى «جاسىل ايماقتا». الماتى، شقو، جامبىل، قوستاناي وبلىستارى، شىمكەنت «سارى»، ال اتىراۋ، اقمولا، اقتوبە، بقو، پاۆلودار، ماڭعىستاۋ، قىزىلوردا،  قاراعاندى وبلىستارى، الماتى قالاسى مەن استانا «قىزىل ايماقتا» تۇر.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە كەمىندە 2 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىندا تابىلعان كەيستەر سانى – 66 مىڭ سىرقات جانە 615 ءولىم جاعدايى. بۇل تۇتاس ناۋرىز ايىنان 32 مىڭعا ارتىق. جالپى كوكتەمنىڭ ەكى ايىندا 101 مىڭ (كۆي+ 98 مىڭ، كۆي- 3 مىڭ) ناۋقاس انىقتالدى، 981 ادام (كۆي+ 827, كۆي- 154) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 311 مىڭنان، 1 تامىزدان بىلايعى كوروناۆيرۋس پنەۆمونياسى 52 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 364 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 6 مىڭى (كۆي+ / U07.1 – 3599, كۆي- / U07.2 – 782, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 47-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 950 مىڭ ادام كوروناۆيرۋسقا قارسى رەسەيلىك «Sputnik V» جانە وتاندىق QazVac ۆاكتسيناسىنىڭ العاشقى دوزاسىن العان.

"The Qazaq Times"