ميانمانىڭ قۇقىق قورعاۋ ورگاندارى ەلدەگى احۋالدى جازعان جاپون ءجۋرناليسى يۋكي كيتازۋميدى ۇستادى. بۇل تۋرالى Kyodo اگەنتتىگى حابارلادى.

45 جاستاعى جۋرناليست ءۇيىنىڭ جانىنداعى يانگوندا ۇستالعان. سونداي-اق، پوليتسيا ونىڭ ۇيىندە ءتىنتۋ جۇرگىزىپ، ۇيالى تەلەفونىن تارتىپ العان. جاپون ديپلوماتتارى ءجۋرناليستىڭ تۇرعان جەرىن ءالى انىقتاي المادى.

كيتازۋمي بۇعان دەيىن جاپونيانىڭ جەتەكشى Nikkei گازەتتەرىنىڭ بىرىندە جۇمىس ىستەگەن. قازىر ول فريلانسەر جانە بىرنەشە جاپوندىق باق-قا ماتەريالدار جازىپ تۇرادى. اقپاندا ءتىلشىنى ميانما پوليتسياسى ۇستاپ، كەيىننەن بوساتقان.

رەسمي توكيو وسىعان بايلانىستى شارا قولداناتىنىن حابارلادى. ەد پرەمەر-ءمينيسترى ەسيحيدە سۋگا: «ميانماداعى ەلشىلىك ارقىلى وقيعانىڭ ءمان-جايىن انىقتايمىز. وتانداسىمىزدى قورعاۋعا جانە بوساتۋعا بار كۇشىمىزدى سالامىز»، – دەدى.

1 اقپاندا ميانما اسكەريلەرى ەلدە توڭكەرىس جاساپ، بيلىكتەگى اۋن سان سۋ چجي مەن بىرنەشە ساياساتكەردى ۇيقاماققا العان. اسكەريلەر بىلتىر قاراشادا وتكەن پارلامەنت سايلاۋىنىڭ ناتيجەسىمەن كەلىسپەگەن ەدى. بىلتىرعى سايلاۋدا اۋنگ سان سۋ چجي باسقاراتىن دەموكراتياشىلاردىڭ ۇلتتىق ليگاسى پارتياسى جەڭىمپاز دەپ تانىلعان. اسكەريلەر سايلاۋ ءادىل وتپەدى دەپ سانايدى.

توڭكەرىستەن بەرى ەلدىڭ تۇكپىر-تۇكپىرىندە اسكەري ۇكىمەتكە قارسى نارازىلىق بولىپ جاتىر. كوتەرىلىستى باسىپ-جانىشتاۋ كەزىندە كەمىندە 700 ادام قازا تاۋىپ، 2600-گە تارتا ادام تۇتقىندالدى.

"The Qazaq Times"