فوتو: reuters.com

جەكسەنبىدە ميانما پوليتسياسى ەلدە توڭكەرىس جاساعان اسكەري بيلىككە قارسى شىققان دەمونسترانتتارعا كۇش قولداندى. Reuters مالىمەتىنشە، كەم دەگەندە 18 نارازىلىق ءبىلدىرۋشى قازا تاپۋىپ، 30-دان استامى جاراقاتتانعان.

ميانماداعى احۋالدى باقىلاپ وتىرعان بۇۇ باسشىسى انتونيۋ گۋتەررەش اسكەريلەردەن ەلدەگى زورلىق-زومبىلىقتى توقتاتۋدى تالاپ ەتتى. دەمالىس كۇندەرى دەمونستراتسيالار ميانمانىڭ كوپتەگەن قالالارىندا ءوتتى. سونىمەن قاتار، نارازىلىقتار يانگوندا، تاۆوي جانە ماندالاي قالالارىندا ۇيىمداستىرىلدى. 1 اقپاندا بولعان بۇلىكتەن كەيىن كەشەگى داتا ميانماداعى قاندى جەكسەنبى رەتىندە اتالدى.

بۇۇ مالىمدەمەسىندە: «باس حاتشى ميانماداعى رەپرەسسيانى قاتاڭ ايىپتايدى. بەيبىت دەمونسترانتتارعا قارسى جاۋىنگەرلىك قارۋ قولدانۋعا جانە تۇتقىنداۋعا جول بەرىلمەۋى ءتيىس. وسى رەتتە بۇۇ حالىقارالىق قاۋىمداستىقتى بىرىگۋگە جانە اسكەري قىزمەتكەرلەرگە ميانما حالقىن قۇرمەتتەۋىن جانە رەپرەسسيانى توقتاتۋىن تالاپ ەتەدى»، – دەلىنگەن.

1 اقپاندا ميانما اسكەريلەرى ەلدە توڭكەرىس جاساپ، بيلىكتەگى اۋن سان سۋ چجي مەن بىرنەشە ساياساتكەردى ۇيقاماققا العان. اسكەريلەر بىلتىر قاراشادا وتكەن پارلامەنت سايلاۋىنىڭ ناتيجەسىمەن كەلىسپەگەن ەدى. بىلتىرعى سايلاۋدا اۋنگ سان سۋ چجي باسقاراتىن دەموكراتياشىلاردىڭ ۇلتتىق ليگاسى پارتياسى جەڭىمپاز دەپ تانىلعان. اسكەريلەر سايلاۋ ءادىل وتپەدى دەپ سانايدى.

اسكەريلەر 1962 جىلدان بەرى بيلىكتە وتىر. 2011 جىلى حالىقارالىق قىسىمنان كەيىن ولار دەموكراتياعا بىرتىندەپ كوشۋگە كەلىسكەن. ەسەسىنە پارلامەنتتەگى ورىنداردىڭ 25%-ىن ساقتاپ، كۇشتىك قۇرىلىمداردى باقىلاۋىندا ۇستاپ قالعان.

دەموكراتيانى قولدايتىن ازاماتتىق قوعام جەتەكشىسى چجو مو تۋن پارتياسى ودان كەيىنگى سايلاۋلاردىڭ بارىندە جەڭگەن. اۋن سان سۋ ءچجيدىڭ دەموكراتياشىلاردىڭ ۇلتتىق ليگاسى بىلتىر سايلاۋدا باسىمدىقپەن جەڭىپ، اسكەريلەردىڭ ارالاسۋىنسىز تاۋەلسىز ۇكىمەت قۇرۋ مۇمكىندىگىنە قول جەتكىزگەن.

"The Qazaq Times"