چەحيا بيلىگى 2014 جىلى قارۋ-جاراق قويماسىندا بولعان جارىلىسقا رەسەيدىڭ قاتىسى بار دەگەن كۇدىكپەن 18 رەسەيلىك ديپلوماتتى ەل اۋماعىنان شىعارۋ تۋرالى شەشىمگە كەلدى.

چەحيا پرەمەر-ءمينيسترى اندرەي ءبابيشتىڭ مالىمەتىنشە، چەحيانىڭ قۇقىق قورعاۋ ورگاندارى ۆربەتيتس اۋىلىنداعى اۋقىمدى جارىلىسقا رەسەي اسكەريلەرىنىڭ قاتىسى بارىن دالەلدەگەن. جەتى جىل بۇرىن ورىن العان بۇل وقيعادان چەحياعا زور شىعىن كەلگەن. سونىمەن قاتار جارىلىس كەزىندە ەكى چەح ازاماتى وپات بولدى.

ەلىنە قايتارىلىپ جاتقان ديپلوماتتار چەحيا اۋماعىنان الداعى 48 ساعاتتىڭ ىشىندە شىعۋى كەرەك. بۇعان دەيىن چەحيا سىرتقى ىستەر ءمينيسترى يان گاماچەكتىڭ ماسكەۋ ساپارىنان باس تارتقانى بەلگىلى بولدى. بۇل ساپاردا ول «سپۋتنيك V» ۆاكتسيناسىن ساتىپ الۋ جونىندە كەلىسسوز جۇرگىزبەك بولعان. بۇل جوسپارى ءۇشىن گاماچەكتى ءوز كواليتسياسىنداعى ارىپتەستەرى دە، وپپوزيتسيا دا سىنعا الدى.

سوڭعى كەزدەرى رەسەي سىرتقى ساياساتتا ءىرى توسقاۋىلدارعا تاپ بولىپ جاتىر. وتكەن اپتادا پولشا سىرتقى ىستەر مينيسترلىگى دە 3 رەسەيلىك ديپلوماتتى ەلىنە قايتارعان. ولار ديپلوماتيالىق قاتىناستى بۇزدى دەپ ايىپتالدى. ال اقش قىرىم اننەكسياسى مەن دونباستاعى جاعدايعا بايلانىستى رەسەيگە كەزەكتى مارتە سانكتسيا ەنگىزگەن.

اق ءۇي اكىمشىلىگى ەنگىزگەن شارا بويىنشا 30-عا جۋىق زاڭدى جانە جەكە تۇلعالارعا شەكتەۋ شارالارى ەنگىزىلىپ، 10-عا جۋىق رەسەيلىكتەر اقش-تان شىعارىلادى. سانكتسيا تزىمىنە ەنەتىندەر قاتارىندا شەنەۋنىكتەر مەن بارلاۋ قىزمەتكەرلەرى بار. سونىمەن قاتار، دجو بايدەن امەريكالىق قارجى ۇيىمدارىنا رۋبلمەن ۇسىنىلعان باعالى قاعازداردى ساتىپ الۋعا تىيىم سالۋ تۋرالى جارلىققا قول قويماق. ال رەسەي بۇعان قارىمتا جاۋاپ رەتىندە رەسەي دە اقش ديپلوماتيالىق ميسسياسىنىڭ 10 قىزمەتكەرىن ەلدەن شىعاراتىنىن مالىمدەدى.

"The Qazaq Times"