الماتى قالاسىندا اپتانىڭ العاشقى كۇنى تىركەلگەن كوروناۆيرۋس جۇققاندار سانى رەكوردتىق دەڭگەيگە جەتتى. ءبىر تاۋلىكتە – 545 ناۋقاس. 468-ءى سيمپتومدىق بەلگىلەرى بار جانە 77-ءسى سيمپتومسىز.
«جۇقپالى اۋرۋلارعا ارنالان ستاتسيونارلاردا 5 مىڭ توسەك-ورىن بار. وندا 2696 ادام، ونىڭ ىشىندە 108 بالا ەمدەلىپ جاتىر. 29 ناۋرىزداعى دەرەك بويىنشا، بارلىق سىرقاتتىڭ اراسىنداعى 32 ادامنىڭ ءحالى وتە اۋىر، ال 302 پاتسيەنتتىڭ جاعدايى اۋىر كۇيدە. ورتا دارەجەدە 2362 سىرقات توسەككە تاڭۋلى. بۇدان باسقا 3,2 مىڭنان استام ادام امبۋلاتورلىق دەڭگەيدە، ياعني ءۇي جاعدايىندا ەمدەلىپ جاتىر»، – دەدى قالالىق قوعامدىق دەنساۋلىق باسقارماسىنىڭ باسشىسى ناريمان تابىنباەۆ بۇگىنگى بريفينگتە.
ونىڭ مالىمەتىنشە، جالپى رەانيماتسيا جانە ينتەنسيۆتى تەراپيا بولىمىندە 135 ادام ەمدەلۋدە، تاعى 285 بوس ورىن دايىندالعان. سونداي-اق 8 ناۋقاس وكپەنى جاساندى جەلدەتۋ قۇرىلعىسىنا قوسىلسا، ودان وزگە 55 ادام ءينۆازيۆتى ەمەس ءوجج جانە 42 ادام High flow اپپاراتىمەن تىنىستاپ جاتىر.
دۇيسەنبى كۇنى 262 ادام اۋرۋحاناعا جاتقىزىلدى جانە 317 ادام ۇيىنە جىبەرىلگەن.
«قالا بويىنشا جينالعان تالداۋ سىنامالارى ەكى زەرتحانادا زەرتتەلدى. ناتيجەسىندە بريتاندىق جانە وڭتۇستىكافريكالىق شتامدار انىقتالدى. بۇلار ادەتتەگىدەن ەكى ەسەگە جىلدام جۇعادى. وسى سەبەپتى كارانتين شارالارى كۇشەيتىلدى. وتكەن اپتادا 100 مىڭعا تۇرعىنعا شاققاندا 149 سىرقات تىركەلدى، رەپرودۋكتيۆتى كورسەتكىش 1,114 بولدى. مەگاپوليس كولەمىندە 3082 ىندەت وشاعى بار»، – دەپ مالىمدەدى باس سانيتار دارىگەر جانداربەك بەكشين.
بەكشين بىلتىرعى «ەكىنشى جارتىجىلدىقتا 281 وقۋشى اۋىرعان ەدى. ال بيىلعى ءۇش ايدا 1468 بالا ناۋقاستاندى. سوندىقتان بارلىق مەكتەپتى ونلاين فورماتقا اۋىستىرۋعا تۋرا كەلدى. تەك كەزەكشى سىنىپتارعا رۇقسات ەتىلدى» دەدى.
پاندەميا باستالعالى كۆي+ (ينفەكتسيا پتر تەستى ارقىلى راستالعان) بويىنشا 35,5 مىڭنان اسا ادام كوروناۆيرۋس جۇقتىرعان. ونداعى 22 656 ادامدا سيمپتومدىق بەلگىلەر انىقتالعان، ال 11 مىڭعا تارتا ناۋقاس سيمپتومسىز تۇرىنە شالدىققان. بۇگىنگە دەيىن 27 مىڭعا جۋىق ادام ەمدەلىپ شىققان. سونىمەن قوسا، 452 ادام قايتىس بولعان.
بىلتىرعى 1 تامىزدان بەرى 5519 ادامعا كۆي- (كوروناۆيرۋس پنەۆمونياسى) دياگنوزى قويىلعان.
ناۋرىز ايىندا ازىرگە الماتى قالاسىندا 8,5 مىڭنان اسا ناۋقاس تىركەلىپ ۇلگەردى. قالادا ناۋرىز ايىنىڭ العاشقى دەكاداسىندا تاۋلىگىنە جۇزدەن كەم ەمەس جاعداي تىركەلدى، 10-ىنان بەرى بۇل سان ەسەلەنىپ وسۋدە. وسىعان دەيىن باس سانيتار بەكشين ءبىر كۇندە اۋرۋحاناعا 500-دەن اسا ناۋقاس تۇسەر بولسا، تولىق لوكداۋن ەنگىزىلەتىنىن ەسكەرتكەن. 21 ناۋرىزدان باستاپ قاتاڭداتىلعان كارانتين رەجيمى 12 ساۋىرگە دەيىن ۇزارتىلدى.
قالادا تىركەلگەن 39 مىڭنان اسا ناۋقاستىڭ 22%-ى نەمەسە 8561-ءى تەك ناۋرىز ايىنا تيەسىلى. ەلدە وسى ايداعى 31 مىڭ سىرقاتتىڭ 27,5%-ى ءبىر عانا الماتى قالاسىندا انىقتالعان.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟