ارمەنيا وپپوزيتسياسى پاشينياننىڭ وتستاۆكاسىن تالاپ ەتىپ ميتينگكە شىقتى

ارمەنيا پارلامەنتى عيماراتىنىڭ جانىندا پاشينياننىڭ وتستاۆكاسىن تالاپ ەتۋشى وپپوزيتسيا وكىلدەرىنىڭ ميتينگى باستالدى. اكتسياعا 3 مىڭعا جۋىق ادام قاتىسىپ جاتىر. جينالعانداردىڭ اراسىندا جاس تا، قارت تا بار.

داڭعىلعا ىرگەلەس جاتقان كوشەلەردە قوعامدىق كولىكتەرگە جول جابىق. ميتينگ باستالار الدىندا وپپوزيتسيالىق «وتاندى قۇتقارۋ قوزعالىسىنڭ» وكىلى، «داشناكتسۋتيۋن» پارتياسىنىڭ مۇشەسى گەگام مانۋكيان مالىمدەمە جاسادى. تريبۋنادا ورناتىلعان باعانداردان اكتسيا باستالار الدىندا ارتساح تۋرالى اندەر شىرقالدى (تانىلماعان تاۋلى قاراباق رەسپۋبليكاسىنىڭ ارميان اتاۋى).

پارلامەنتكە جينالعانداردى پوليتسيا قورشاۋعا العان. بىراق ولاردىڭ سانى از جانە ولار اكتسيا وتكىزۋگە كەدەرگى كەلتىرمەيدى.

تاڭەرتەڭ نيكول پاشينيان ارميان قارۋلى كۇشتەرى باس شتابىنىڭ باسشىسى گەنەرال ونيك گاسپارياندى قىزمەتىنەن بوساتۋ تۋرالى داۋلى جارلىقتىڭ كۇشىنە ەنگەنىن حابارلادى. ەل پرەزيدەنتى قۇجاتقا قول قويعان جوق، بىراق ول دا كونستيتۋتسيالىق سوتقا شاعىمدانعان جوق. گاسپارياننىڭ ءوزى وتستاۆكاسىن «كونستيتۋتسياعا قايشى شەشىم» دەپ قارسىلىق ءبىلدىرىپ وتىر. سونىمەن بىرگە پرەزيدەنت «اسكەري قىزمەت جانە اسكەري قىزمەتشىنىڭ مارتەبەسى تۋرالى» زاڭدى سوتقا تەكسەرۋگە جىبەردى. اتالعان قۇجات باس شتاب باسشىسىن تاعايىنداۋ جانە قىزمەتىنەن بوساتۋ ءتارتىبىن انىقتايدى.

ال وپپوزيتسيا وكىلدەرى گاسپاريان قىزمەتىندە قالىپ، پرەمەر-مينيستر پاشينياننىڭ وتستاۆكاسىن تالاپ ەتىپ وتىر.

"The Qazaq Times"