«ەركىندىك قاناتى» باقىلاۋ ۇيىمى: تاريحتاعى ەڭ ادىلەتسىز سايلاۋ

وسى جولعى ءماجىلىس جانە ءماسليحات سايلاۋىن ءحال-قادىرىنشە باقىلاعان «ەركىندىك قاناتى» ۇيمى جەكسەنبىدەگى ساياسي وقيعانى تاريحتاعى «ەڭ قيىن جانە ادىلەتسىز وتكەن سايلاۋ» ەكەنىن حابارلادى.

«ەركىندىك قاناتى» قورىنىڭ اتقارۋشى ديرەكتورى ەلەنا شۆەتسوۆا ءماجىلىس سايلاۋىنا بايلانىستى رەسمي مالىمدەمە جاريالادى.

«سايلاۋعا ءبىر اپتا قالعاندا قازاقستاننىڭ 15 وڭىرىنەن باقىلاۋشىلار سانى 302 ادام بولدى، الايدا سايلاۋ كۇنى ولاردىڭ سانى 196-دان 141-گە دەيىن قىسقاردى. باقىلاۋشىلار سانىنىڭ كۇرت تومەندەۋىنە CوVID-19 پاندەمياسى جانە ينفەكتسيا جۇعۋ قاۋىپى سەكىلدى بىرنەشە سەبەپتەرى بولدى. دەگەنمەن، ازاماتتاردىڭ باقىلاۋدان باس تارتۋىنىڭ باستى سەبەبى – قازاقستان ورتالىق سايلاۋ كوميسسياسىنىڭ، قالالار مەن وبلىستاعى جەرگىلىكتى باسقارۋ ورگاندارىنىڭ ساياساتى بولدى دەپ ەسەپتەيمىز»، – دەلىنگەن ۇيىم مالىمدەمەسىندە.

شۆەتسوۆانىڭ ايتۋىنشا،  بىلتىر قاراشا ايىنان بەرى قوردىڭ سالىق ەسەپتىلىگىن سىلتاۋراتقان قۇزىرلى ورگاندار كەمشىلىك ىزدەپ، كەدەرگى جاساۋعا تىرىسقان. قىسىمنىڭ ەڭ اۋىرى – 4 جەلتوقسانداعى وسك قاۋلىسى مەن 29-ىنداعى باس مەملەكەتتىك سانيتارلىق دارىگەردىڭ قاۋلىسى بولعان. ەكى بىردەي قاۋلىنىڭ مازمۇنى «تاۋەلسىز باقىلاۋشىلاردىڭ فۋنكتسيالارىن شەكتەگەن».

ۇيىم سايلاۋ كۇنى ۋچاسكەلىك كوميسسيالار تاراپىنان 18 ءتۇرلى جاعدايعا كۋا بولدىق دەيدى. ءتىپتى ەڭ ءجيى كەزدەسكەن كەدەرگىلەر مەن زاڭ بۇزۋشىلىقتاردىڭ جىكتەمەسىن جاساعان.

ولار: قۇجاتقا شۇيلىگۋ; كوميسسيانىڭ باقىلاۋشىلاردى تىرپ ەتكىزبەي، «اكۆاريۋمدا» ۇستاۋى جانە ارانداتۋ ارەكەتى; سالاۋشىلار ءتىزىمىن جاسىرىن ۇستاۋى; كەيبىر ۋچاسكەلەردە باقىلاۋشىلاردى تىركەمەي-قۋىپ شىققان; ءبىر كابيناعا ەكى ادام كىرۋى; جاشىكتەردىڭ پلومبالارى جارتىلعان;  كابينادا داۋىس بەرۋ قۇپياسىن بۇزاتىن باقىلاۋ كامەرالارىن ورنالاستىرۋ; سايلاۋشىلارعا بيۋللەتەندەردى جەكە كۋالىگىنسىز ۇلەستىرۋ; قورىتىندى حاتتامالاردى بەرمەۋ;  داۋىس سانىن ەسەپتەۋدى كەيىنگە قالدىرۋ; دەزينفەكتسيانى سىلتاۋراتىپ باقىلاۋشىلاردى ۋچاسكەدەن قۋىپ شىعۋ ت.ب.

"The Qazaq Times"