Almatı qalasındağı saylauşınıñ nebäri 20%-dayı kelgen №292 saylau uçaskesi. Foto: QT / Asan Anarbaywlı

Osı jolğı mäjilis jäne mäslihat saylauın häl-qadirinşe baqılağan «Erkindik Qanatı» wymı jeksenbidegi sayasi oqiğanı tarihtağı «eñ qiın jäne ädiletsiz ötken saylau» ekenin habarladı.

«Erkindik Qanatı» qorınıñ atqaruşı direktorı Elena Şvecova mäjilis saylauına baylanıstı resmi mälimdeme jariyaladı.

«Saylauğa bir apta qalğanda Qazaqstannıñ 15 öñirinen baqılauşılar sanı 302 adam boldı, alayda saylau küni olardıñ sanı 196-dan 141-ge deyin qısqardı. Baqılauşılar sanınıñ kürt tömendeuine COVID-19 pandemiyası jäne infekciya jwğu qauipi sekildi birneşe sebepteri boldı. Degenmen, azamattardıñ baqılaudan bas tartuınıñ bastı sebebi – Qazaqstan Ortalıq saylau komissiyasınıñ, qalalar men oblıstağı jergilikti basqaru organdarınıñ sayasatı boldı dep esepteymiz», – delingen wyım mälimdemesinde.

Şvecovanıñ aytuınşa,  bıltır qaraşa ayınan beri qordıñ salıq eseptiligin sıltauratqan qwzırlı organdar kemşilik izdep, kedergi jasauğa tırısqan. Qısımnıñ eñ auırı – 4 jeltoqsandağı OSK qaulısı men 29-ındağı bas memlekettik sanitarlıq därigerdiñ qaulısı bolğan. Eki birdey qaulınıñ mazmwnı «täuelsiz baqılauşılardıñ funkciyaların şektegen».

Wyım saylau küni uçaskelik komissiyalar tarapınan 18 türli jağdayğa kuä boldıq deydi. Tipti eñ jii kezdesken kedergiler men zañ bwzuşılıqtardıñ jiktemesin jasağan.

Olar: qwjatqa şüyligu; komissiyanıñ baqılauşılardı tırp etkizbey, «akvariumda» wstauı jäne arandatu äreketi; salauşılar tizimin jasırın wstauı; keybir uçaskelerde baqılauşılardı tirkemey-quıp şıqqan; bir kabinağa eki adam kirui; jäşikterdiñ plombaları jartılğan;  kabinada dauıs beru qwpiyasın bwzatın baqılau kameraların ornalastıru; saylauşılarğa byulleten'derdi jeke kuäliginsiz ülestiru; qorıtındı hattamalardı bermeu;  dauıs sanın esepteudi keyinge qaldıru; dezinfekciyanı sıltauratıp baqılauşılardı uçaskeden quıp şığu t.b.

"The Qazaq Times"