اقساقالوۆتىڭ ايتقانى – قاتە: مينيسترلىك پەن اكىمنىڭ ءسوزى نەگە قايشى؟

16 قاراشا كۇنى پرەزيدەنت توقاەۆ «بىرقاتار وبلىستاردا  كوروناۆيرۋس ىندەتىنە قاتىستى جاڭا جاعدايلاردى جاسىرۋ دەرەكتەرى انىقتالعانىن» مالىمدەگەن. پرەزيدەنتتىڭ ايتۋىنشا، ستاتيستيكانى بۇرمالاۋ فاكتىسى انىقتالعان ايماقتار – شقو، سقو، پاۆلودار،  اقمولا،  قوستاناي وبلىستارى. ءتىپتى ول جاۋاپتى شەنەۋنىكتەردىڭ قاتىسۋقان جيىندا «وتىرىكتى شىنداي ەتىپ جاسىرعانىن» اشىق ايىپتاعان.

قاراشا ايىنىڭ سوڭىندا ءوڭىر اكىمدەرى پاۆلودار وبلىسىندا 59, اقمولا وبلىسىندا جۇزدەن اسا، قوستاناي وبلىسىندا 57, شقو-دا 2 جۇزدەن استام، سقو-دا ءجۇز شاقتى ناۋقاستىڭ مالىمەتى جالپى ەسەپكە كەشىگىپ ەنگىزىلگەنىن مالىمدەگەن. بۇعان سەبەپ – اۋرۋحانالاردا ناۋقاستار ارتقان تۇستا ۆيرۋس انىقتالعانداردىڭ مالىمەتىن ۇسىنۋ پروتسەسى كەشىكتىرىلگەن. سانيتارلىق-ەپيدەميولوگيالىق باقىلاۋ كوميتەتىنىڭ باستىعى ايجان ەسماعامبەتوۆانىڭ رەداكتسياعا بەرگەن جاۋاپ حاتىندا كادر تاپشىلىعىنان جۇكتەمە اۋىرلاپ، دەرەك ۋاقتىلى وڭدەلىپ-جولدانباعانى ايتىلادى.

بىراق كوميتەت باسشىسى مەن اكىمنىڭ ءسوزى كەرەاعار. سقو اكىمى قۇمار اقساقالوۆ جۇزدەن استام، ال مينيسترلىك وكىلى ايجان ەسماعامبەتوۆا 2 ءجۇز شاقتى جاعداي ۋاقىتىندا تىركەلمەي قالعانىن ايتقان.

¡تولىعىراق: 27 قاراشا كۇنگى ورتكومداعى ءباسپاسوز جيىنىندا ەسماعامبەتوۆا قازان-قاراشا ايلارىندا سولتۇستىك قازاقستان وبلىسىندا 100-دەي كەيس ۋاقتىلى ەسەپكە الىنباي، قالىپ قويعانىن ناقتىلاپ ايتقان. جەلتوقساننىڭ 8-ءى وتكەن ەسەپ بەرۋ بريفينگىندە اكىم اقساقالوۆ كوميتەت باستىعىنىڭ ءسوزىن ەسكە سالعان تىلشىگە ۆەدومستۆو تسيفرىن تەرىستەپ، «مەن جۇزدەن اسا فاكتى دەدىم عوي» دەپ قاتۋ جاۋاپ بەرگەن ەدى. ەرتەڭىنە دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتارلىق دارىگەر ەرلان قياسوۆ بۇل قايشىلىق تۋرالى سۇراعانىمىزدا توسىرقاپ، جاۋاپتى جازباشا جولداۋعا ءسوز بەرگەن. مينيسترلىك ارادا ءۇش اپتاعا جۋىق ۋاقىت وتكەندە ارەڭ جاۋاپ بەردى. اكىمنىڭ ايتانى – قاتە.

رەداكتسياعا كەلگەن رەسمي جاۋاپقا سايكەس، مينيسترلىك تەكسەرىسى بارىسىندا بەس بىردەي وڭىردە كوروناۆيرۋس پتر تەستى ارقىلى انىقتالعان ناۋقاستاردىڭ سانى ەسەپكە الىنباي قالعان.

• شىعىس قازاقستان وبلىسىندا – 273 جاعداي
• سولتۇستىك قازاقستان وبلىسىندا – 177 جاعداي
• اقمولا وبلىسىندا – 112 جاعداي
• پاۆلودار وبلىسىندا – 59 جاعداي
• قوستاناي وبلىسىندا – 58 جاعداي

ەلدە كوروناۆيرۋس جۇققانى پتر تەستى ارقىلى ناقتىلانعان 650-دەن استام ادامنىڭ مالىمەتى جالپى ەسەپكە دەر كەزىندە كىرمەي قالعان. رەسمي جاۋاپقا قاراعاندا، قازىرگى تاڭدا ستاتيستيكا قالپىنا كەلتىرىلگەن.

وسىلايشا، مينيسترلىك وبلىس اكىمى قۇمار اقساقالوۆتىڭ دەرەگىن جوققا شىعاردى.

قازاقستاندا ادەتتەگىدەن بىرنەشە ەسەگە كۇرت وسكەن بيىلعى 256 مىڭ پنەۆمونيا كەيسىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوپ. تاۋەلسىز دارىگەرلەر مەن مەديتسينا ساراپشىلارى، قوعام بەلسەندىلەرى ستاتيستيكانىڭ اشىقتىعى مەن ادىلدىگىنە سەنىڭكىرەمەيدى.

"The Qazaq Times"