فوتو: ەرا

ەۋرووداق ەلدەرىنىڭ باسشىلارى الداعى جەتى جىلعا ارنالعان بيۋدجەتتى بەكىتتى. ەۋروپالىق كەڭەستىڭ باسشىسى چارلز ميشەلدىڭ مالىمەتىنشە، بيۋدجەت كولەمى 2 تريلليون ەۋرو.

قارجىنىڭ 750 ميللياردى كوروناۆيرۋس پاندەمياسىنان زارداپ شەككەن ەكونوميكانى قايتا قالپىنا كەلتىرۋگە باعىتتالماق. بيىل ۆەنگريا مەن پولشا كوروناۆيرۋس داعدارىسىمەن كۇرەسۋگە بولىنەتىن قاراجاتتى قابىلداماي تاستاعان. بۋداپەشت پەن ۆارشاۆا وكىلدەرىنىڭ ايتۋىنشا، بۇل قۇقىقتىق مەملەكەت ءپرينتسيپىن ساقتاۋدى قامتاماسىز ەتەتىن ارنايى مەحانيزم ەنگىزۋگە قارسى قادام. ويتكەنى اتالعان مەحانيزم بويىنشا قۇقىقتىق سالانى شەكتەيتىن ەلدەرگە قارجىلاندىرۋدى توقتاتۋ قاراستىرىلعان بولاتىن.

سوعان قاراماستان، بيۋدجەت جوسپارى تولىققاندى بەكىتىلىپ وتىر. الايدا وداققا مۇشە ەلدەردىڭ ورتاق مامىلەگە قالاي كەلگەنى ازىرگە بەلگىسىز.

جاقىندا ەۋروپالىق وداقتىڭ مەملەكەت جانە ۇكىمەت باسشىلارى بريۋسسەلدە ەكى كۇندىك سامميتكە قاتىسادى. بۇل  – پاندەمياعا بايلانىستى سوڭعى ەكى ايداعى العاشقى وفلاين كەزدەسۋ. سامميتتە تاراپتار قوعامداستىقتىڭ 2021-2027 جىلدارعا ارنالعان جەتى جىلدىق بيۋدجەتتىك جوسپارىن بەكىتۋ، €1,07 ترلن جانە ەو-نى قالپىنا كەلتىرۋ قورىن تالقىلايدى. قارجى ءبولۋ ماسەلەسىنە بايلانىستى بۇل كەلىسىمگە ۆەنگريا مەن پولشا تىيىم سالعان.

ءسامميتتىڭ ەكىنشى كۇردەلى تاقىرىبى – تۇركيانىڭ جەرورتا تەڭىزىندەگى ءىس-قيمىلى جانە انكاراعا قاتىستى جاڭا سانكتسيالار. ال ۇلىبريتانيانىڭ ەو-دان شىعۋىنا بايلانىستى Brexit-تەن كەيىنگى ەكىجاقتى قاتىناستار تۋرالى كەلىسىم جيىننىڭ ءۇشىنشى كۇنىندە تالقىلانباق.

"The Qazaq Times"