ناۋرىز ايىنان باستاپ ەلدە بارلىعى 7 مىڭنان استام بالا اۋىرعان. ونىڭ 5,2 مىڭىنا كوروناۆيرۋس جۇقسا، قالعان 1,8 مىڭ بالا كوروناۆيرۋس پنەۆمونياسىنا شالدىققان دەيدى دەپارتامەنت باسشىلىعى. بىراق ۆيتسە-مينيستر اجار عينياتقىزىنىڭ مالىمەتى مۇلدەم باسقاشا. 

مينيسترلىك قاراماعىنداعى مەديتسينالىق كومەكتى ۇيىمداستىرۋ دەپارتامەنتىنىڭ باستىعى ازامات دۇيسەنوۆ رەداكتسيانىڭ سۇراعىنا بەرگەن جاۋابىندا كوروناۆيرۋسپەن 5265, ونىڭ پنەۆمونيالىق تۇرىمەن 1810 بالا اۋىرعانىن جەتكىزدى. حالىقارالىق اۋرۋلار جىكتەلىمىندە «U07.2» كودىمەن بەلگىلەنەتىن كۆي- نەمەسە كوروناۆيرۋس پنەۆمونياسىنىڭ جيىنتىق ەسەبى ايتارلىقتاي از بولۋى جاڭا فورماتتاعى رەسمي ستاتيستيكانىڭ 1 تامىزدان بەرى جۇرگىزىلۋىنە بايلانىستى.

تامىز ايىندا 808 بالانىڭ وكپەسى قابىنعانى انىقتالعان. كەيىنگى ءۇش ايدا جاسىنا تولماعان 168 سابيدەن پتر تالداۋى تەرىس كورسەتكەنىمەن، كوروناۆيرۋس پنەۆمونياسى دياگنوزى قويىلعان. تامىزدا – 76, قىركۇيەكتە – 58, ال قازان ايىندا – 34 نارەستەنىڭ «كۆي-» اۋرۋىنا شالدىققانى حابارلانعان. مينيسترلىكتىڭ جەدەل دەرەكتەر قورىن ۇيىمداستىراتىن اقپاراتتىق جۇيەنىڭ دەرەگىنشە، ماۋسىم-شىلدە ايلارىندا جيىنى 3 مىڭنان ارتىق بالادان كوروناۆيرۋس تابىلعان. قازان ايىندا كوروناۆيرۋس جۇققان وسكىنشەكتەردىڭ قاتارى قىركۇيەككە قاراعاندا ەسەلەنگەن. ماماندار مۇنى وقۋ جىلى مەن ەپيدەميا ماۋسىمىنىڭ باستالۋىمەن تۇسىندىرەدى.

دەگەنمەن كوروناۆيرۋس پنەۆمونياسىنا شالدىققان بالالار تۋرالى دەرەك ۆيتسە-مينيستر اجار عينياتقىزىنىڭ رەداكتسياعا بەرگەن جاۋابىمەن قابىسپايدى. 20 قازان كۇنگى مينيستر ورىنباسارىنىڭ جاۋابىندا «1 تامىزدان 13 قازانعا دەيىن كوروناۆيرۋستىق ينفەكتسيا 27 709 ادام ساۋىعىپ شىققانىن، ونىڭ 4058-ءى بالا ەكەنىن» بايانداعان. وسى حاتتاعى ساندارعا قاراعاندا، ايىققانداردىڭ 1130-ى جاسىنا تولماعان ءسابي، 258-ءى 15 پەن 17 جاس ارالىعىنداعى ءجاسوسپىرىم. ءالى جازىلىپ شىقپاعانداردى ەسەپكە العاندا پنەۆمونيامەن اۋىرعان بالالاردىڭ سانى الدەقايدا كوپ بولۋى مۇمكىن.ءبىر مينيسترلىكتەگى دەپارتامەنت باستىعى مەن ۆيتسە-ءمينيستردىڭ دەرەگى ەكى ءتۇرلى. ءبىر ينديكاتورعا قاتىستى كورسەتكىشتىڭ ءارتۇرلى بولۋىن مينيسترلىكتىڭ ءباسپاسوز قىزمەتىنە سۇراپ كوردىك. جاۋاپ بەرىلگەن بويدا اقپاراتتى تولىقتىراتىن بولامىز.

قازاقستاننىڭ دەنساۋلىق ساقتاۋ ۆيتسە-ءمينيسترى اجار عينياتقىزىنىڭ رەداكتسيا سۇراعىنا بەرگەن №01-1-07/7787 جاۋاپ حاتىنان ءۇزىندى. فوتو: حاتتان فراگمەنت

15 قاراشاداعى جاعداي بويىنشا، كوروناۆيرۋستان اۋىرىپ جاتقان 9162 ادامنىڭ 458-ءى بالا. ال كوروناۆيرۋس پنەۆمونياسىنا شادىعىپ، ەمدەلىپ جاتقان 10 617 ناۋقاستىڭ نەشەۋى كامىلەت جاسىنا تولماعانىن ءبىلۋ ازىرگە مۇمكىن ەمەس. سەبەبى دەنساۋلىق ساقتاۋ مينيسترلىگى كۆي- دياگنوزى تۋرالى اقپاراتتى جاريالاۋدى ءالى كۇنگە دەيىن جۇيەلەي الماعان. بۇل كوروناۆيرۋس جۇققانى پتر تەستى ارقىلى راستالعان مالىمەتتەر ساناتى سياقتى تولىق ءارى ناقتى ەمەس.

“The Qazaq Times”