كورنەكى سۋرەت. فوتو: wpengin

Facebook كورپوراتسياسى يران ۇكىمەتتىك ۇيىمدارىن ناسيحاتتاۋ ماقساتىندا قۇرىلعان اككاۋنتتاردى ءوشىردى.

كورپوراتسيانىڭ ءباسپاسوز حابارلاماسىندا: «Facebook-تەگى 12 اككاۋنت پەن التى پاراقشانى جانە ينستاگرامداعى 11 اككاۋنتتى جويدىق. سەبەبى اككاۋنتتار يران ۇكىمەتتىن ناسيحاتتاۋعا باعىتتالعان. سونىمەن قاتار اقش پەن يزرايلگە قارسى جالعان مالىمەتتەر تاراتقان»، – دەلىنگەن.

Facebook كيبەرقاۋىپسىزدىك ءبولىمىنىڭ باسشىسى ناتانيەل گلەيحەردىڭ ايتۋىنشا، كومپانياعا «قاۋىپتى» اككاۋنتتاردى اقش فەدەرالدى تەرگەۋ بيۋروسى ۇسىنعان. ناتيجەسىندە، وتكەن اپتادا Facebook باسشىلىعى امەريكاداعى سايلاۋعا بايلانىستى جالعان اقپارات تاراتىپ، قاۋىپ-قاتەر توندىرەتىن اككاۋنتتاردىڭ بار ەكەنىن مالىمدەگەن. مۇنىڭ سالدارىنان بولاتىن حاكەرلىك شابۋىلداردىڭ قاۋپى جوعارى.

قۇراما شتاتتارىنداعى پرەزيدەنت سايلاۋى الدىندا جالعان اقپارات تاراتاتىن اككاۋنتتار مەن حاكەرلىك شابۋىلدار سانى ارتقان. ءدال بۇگىن بەلگىسىز توپ اقش پرەزيدەنتى دونالد ترامپتىڭ سايلاۋالدى شتابىنىڭ ۆەب-سايتىن بۇزىپ، ءبىراز ۋاقىتتان كەيىن ونى قالپىنا كەلتىرىپ ۇلگەرگەن.

سايلاۋالدى شتابتىڭ ۆەب-سايتىنا حاكەرلەر: «الەم پرەزيدەنت دونالد ترامپتىڭ كۇن سايىنعى جالعان اقپاراتتارىنان جالىقتى. الەمگە شىندىقتى ايتاتىن ۋاقىت كەلدى. ترامپ مەن ونىڭ وتباسىنا قاتىستى بىرنەشە قۇرىلعى بۇزىلدى»، – لەپ جازىلعان.

رەسمي ەمەس مالىمەتتەرگە سۇيەنسەك، حاكەرلەر «قۇپيا اقپاراتقا» قول جەتكىزە العان. ونىڭ ىشىندە ۋاشينگتون اكىمشىلىگىنىڭ «كوروناۆيرۋستىڭ پايدا بولۋىنا» قاتىسۋى، اق ءۇي باسشىسىنىڭ باسقا مەملەكەتتەرمەن سايلاۋ ناتيجەلەرىن وزگەرتۋ تۋرالى كەلىسىم جاساعانى جايلى مالىمەتتەر بار دەلىنگەن. سونىمەن قاتار كريپتوۆاليۋتانىڭ ەلەكتروندىق ءامياندارىنىڭ مەكەن-جايى كورسەتىلگەن.

"The Qazaq Times"