پومپەو: اقش ءۇشىن قاۋىپتى مەملەكەت – قىتاي

Fox News تەلەارناسىنا سۇحبات بەرگەن اقش مەملەكەتتىك حاتشىسى مايك پومپەو رەسەيمەن سالىستىرعاندا قىتاي امەريكاعا ۇلكەن قاۋىپ توندىرەدى دەيدى.

پومپەوعا ەكى الپاۋىت مەملەكەتتىڭ قايسىسى ەلدىڭ ىشكى جانە سىرتقى ساياساتىنا ارالاسىپ، قاۋىپسىزدىگىنە نۇقسان كەلتىرۋى مۇمكىن دەگەن ساۋال قويىلدى. مەملەكەتتىك دەپارتامەنت باسشىسى: «امەريكا قۇراما شتاتتارى ءۇشىن شەتەلدىك دەرجاۆا رەتىندە ەڭ ۇلكەن قاۋىپ – قىتاي كوممۋنيستىك پارتياسىنان. سەبەبى قازىر ولاردىڭ قارۋلى كۇشتەرى نىعايۋدا. ولار امەريكانى باسىپ العىسى كەلەدى، بىراق پرەزيدەنت ترامپ بۇعان جول بەرمەيدى»، – دەدى.

سارسەنبىدە CNN تەلەارناسىندا وتكەن باعدارلامادا اقش-تىڭ ادىلەت ءمينيسترى، باس پروكۋرورى ۋيليام باررعا دا وسىنداي ساۋال قويىلعان بولاتىن. سۇحباتتا رەسمي وكىل «امەريكاداعى سايلاۋعا بيىل قىتاي ارالاسىپ، قاۋىپ تۋعىزۋى مۇمكىن» – دەدى.

باررعا اقش-تاعى سايلاۋ پروتسەستەرىنە ارالاسۋعا تىرىسقان مەملەكەتتەر (قىتاي، رەسەي، يران) تۋرالى سۇراق قويىلدى. بارلاۋ دەرەكتەرىن زەرتتەگەن بارر امەريكاعا باستى قاۋىپ قىتايدان دەپ اشىپ ايتتى.

بۇعان دەيىن اقش پرەزيدەنتى دونالد ترامپ وسى ماسەلە بويىنشا مالىمدەمە جاساعان بولاتىن. جۋرناليست شەريل اتكيسسونعا سۇحبات بەرگەن ترامپ: «مەن رەسەي ءۇشىن قاۋىپتىمىن جانە پۋتين مۇنى تۇسىنەدى. پۋتينمەن ءتىل تابىستىق، بىراق ول مەنىڭ سايلاۋدا جەڭىسكە جەتۋىمدى قالامايدى. جاقسى بايلانىستا بولساق تا، ول مەنىڭ جەڭىسىمە قارسى. سونىمەن قاتار قىتاي دا مەنىڭ ۇتىلعانىمدى قالايدى»، – دەدى.

اقش بارلاۋ اگەنتتىكتەرى 2016 جىلى وتكەن پيەزيدەنتتىك سايلاۋدا رەسەي سايلاۋ پروتسەسىنە ارالاستى دەپ ايىپتاعان. وسى ءىس بويىنشا يەرگەۋدى اقش ارنايى پروكۋرورى روبەرت ميۋللەر ەكى جىلعا جۋىق ۋاقىت بويى جۇرگىزدى. اتاپ ايتقاندا، ول پۋتين مەن ترامپ اراسىنداعى كەلىسسوزدەردى تەرگەدى. بىراق بولجامدار دالەلدەنگەن جوق.

اق ءۇي باسشىسى ترامپ سايلاۋ ناۋقانى كەزىندە رەسەيلىك شەنەۋنىكتەرمەن زاڭسىز بايلانىستار تۋرالى كۇدىكتى جوققا شىعارعان. ەلدە كەزەكتى پرەزيدەنتتىك سايلاۋ بيىل قاراشادا وتەدى.

اقپاندا 2021 جىلعا ارنالعان بيۋدجەت جوباسىندا رەسەي مەن قىتاي اقش ءۇشىن نەگىزگى قاۋىپتى مەملەكەت دەپ اتالدى. اق ءۇي رەسەيگە قارسى تۇرۋ ءۇشىن 700 ميلليون دوللار ءبولۋدى ۇسىندى. بۇل قاراجات اقش-تىڭ ەۋروپاداعى جانە ورتالىق ازياداعى وداقتاستارىن قولداۋعا جانە ورتاق قاۋىپسىزدىكتى نىعايتۋعا جۇمسالادى. ال «رەسەيلىك ۇگىت-ناسيحات، جالعان اقپاراتپەن» كۇرەسۋگە قوسىمشا 24 ميلليون دوللار ءبولۋ جوسپارلانعان.

"The Qazaq Times"