دۇنيەجۇزىلىك دەنساۋلىق ساقتاۋ اسسامبلەياسى 2020 جىلدى مەيىربيكەلىك جانە اكۋشەرلىك قىزمەت سالاسىنداعى قىزمەتكەرلەردىڭ حالىقارالىق جىلى دەپ جاريالادى.

ددسۇ 2030 جىلعا دەيىن مەيىربيكەلىك جانە اكۋشەرلىك سالادا 9 ملن قوسىمشا جۇمىس ورنىن قۇرۋ قاجەت دەيدى.

ۇيىمنىڭ رەسمي سايتىنداعى حابارلامادا: «مەدبيكەلەر مەن اكۋشەرلەر دەنساۋلىق ساقتاۋ سالاسىندا قىزمەت كورسەتۋدە ماڭىزدى ءرول اتقارادى. ولار ءوز ءومىرىن انالار مەن بالالاردىڭ قامقورلىعىنا ارنايدى، ومىرلىك ماڭىزدى ەكپەلەر سالىپ، مەديتسينالىق ۇسىنىس-كەڭەستەرىن بەرەدى، قارت ادامدارعا كۇتىم جاسايدى. جالپى العاندا حالىقتىڭ دەنساۋلىق ساقتاۋ سالاسىنداعى نەگىزگى كۇندەلىكتى قاجەتتىلىكتەرىن قاناعاتتاندىرادى. ولار كوبىنە جەرگىلىكتى تۇرعىندار ءۇشىن مەديتسينالىق كومەك كورسەتەتىن العاشقى جانە جالعىز ادام بولىپ وتىر»، — دەلىنگەن.

ايتا كەتەيىك، Covidvisualizer.com سايتىنىڭ مالىمەتىنشە، الەم بويىنشا كوروناۆيرۋس دەرتىنە شالدىققاندار سانى 2 ميلليونعا جەتكەن. 126 800 ادام قايتىس بولعان. ۆيرۋس دەرەگى ەڭ كوپ تىركەلگەن ەلدەر وندىعىندا اقش، يسپانيا، يتاليا، فرانتسيا، گەرمانيا، ۇلىبريتانيا، قىتاي، يران، تۇركيا جانە بەلگيا تۇر.

"The Qazaq Times"