ءسىزدىڭ «مۋزىكا دا شەكارا جوق» دەگەن ءسوزدى ۇنەمى ەستىپ جۇرگەنىڭىز انىق. الايدا بۇل ءسوزدىڭ اۆتورىنىڭ كىم ەكەنىن بىلەسىز بە؟ بۇل 29 جاستاعى، الەمدى تالانتىمەن تاڭقالدىرعان پيانيست نوبۋيۋكي ءتسۋدزيدىڭ (اعىل. Nobuyuki Tsujii,  (جاپون.) 辻井 伸行)  ءسوزى بولاتىن.  

الەمنىڭ سان جەرىندە مىڭداعان تىڭداۋشى كورەرمەنىن ورنىنان تىك تۇرعىزعان تالانتتى پيانيست ءارى كومپوزيتور  نوبۋيۋكي تسۋدزي بۇل ومىرگە زاعيپ بولىپ كەلىپتى.   الايدا ءتاڭىر وعان جۇرتتى تاڭداي قاقتىرار مۋزىكالىق دارىن سىيلاپتى. ول سول دارىنىمەن مۋزىكانتتار ءۇشىن ەڭ باعالى  ۆانا كليبەرن اتىنداعى التىن مەدالدى ەنشىلەگەن.

تۋمىسىنان زاعيپ بولىپ دۇنيەگە كەلگەن نوبۋيۋكي ءتسۋدزيدىڭ بويىندا ادامنىڭ اقىلى جەتپەيتىن كوپتەگەن قاسيەتتەر بار. ايتالىق، ول تۇستەردى كورمەسە دە ءدام سەزۋ تۇيسىگى ارقىلى اجىراتا الادى ەكەن. مۇمكىن ول مۋزىكادان باسقا ەشنارسەنى كورە المايتىن بولار. نوبۋيۋكي تسۋدزي  ەكى جاسىندا روجدەستۆالىق  «Jingle Bells» ءانىن تۇيسىگىمەن ورىنداپ، ەرەكشە مۋزىكالىق قابىلەتىمەن جاپونياعا تانىمال بولعان. ءتورت جاسىندا مۋزىكاعا جۇيەلى تۇردە دەن قويىپ، ون جاسىندا وساكاداعى سيمفونيالىق ورتالىقتا العاشقى دەبيۋتىن ورىندايدى. ون ەكى جاسىندا نوبۋيۋكي، توكيوداعى سانتري حوللدا جانە نيۋ-يوركتىڭ كارنگەي-حوللداعى كونتسەرتتىك زالىندا ونەر كورسەتەدى.

ءپيانيستىڭ رەپەرتۋارلارىندا موتسارتتىڭ، بەتحوۆەننىڭ، شوپەننىڭ، ءليستىڭ جانە پاگانيننىڭ دەبيۋسسي سىندى الەمدىك كلاسسيك كومپوزيتورلارىنىڭ شىعارمالارى بار. ول ءوزى دە جۇرەك قىلىن تەربەيتىن كوپتەگەن كومپوزيتسيالىق شىعارمالاردىڭ اۆتورى. الەمگە كەڭ تاراعان جاپوندىق درامالار مەن كينو فيلمدەردىڭ ارقاۋ مۋزىكاسىن جازعان. تالانت يەسىنىڭ ءوزى  تۋرالى دا كينو تۇسىرىلگەن.

نوبۋيۋكي تسۋدزي  رۋرە اتىنداعى فورتەپيونالىق  فەستيۆالگە قاتىسىپ ۆاشينگتون، يندياناپوليس، حيۋستون، ابۋ-دابي سىندى سالتاناتتى سارايلارىندا ونەر كورسەتكەن. ول وركەستر باسقارۋشىلارى مەن بىرگە تانىمال دريجەرلەر:  ۆلاديمير اشكەنازي، ۆلاديمير سپيۆاكوۆ، يۋتاكا سادولارمەن شىعارماشىلىق جولىن جالعاستىرۋدا.

“The Qazaq Times”