رەسەي باس پروكۋراتۋراسى بۇرىنعى شەنەۋنىكتەردىڭ شىعىندارىن تەكسەرمەك

رەسەيدىڭ باس پروكۋراتۋراسى بۇرىنعى شەنەۋنىكتەر مەن ولاردىڭ وتباسىلارىنىڭ شىعىندارىن باقىلاۋدى ۇسىندى. قۇزىرلى ورگان شەنەۋنىك جۇمىستان شىققاننان كەيىن دە ولاردىڭ جەمقورلىق سحەمالارىن وسىلاي ءاشكەرەلەۋدى كءوزدەپ وتىر. بۇل تۋرالى "يزۆەستيا" گازەتىنە سىلتەمە جاساپ "ورتالىق ازيا حابار قىزمەتى" جازدى.

ولاردىڭ مۇلىكتەرى زاڭسىز جولمەن الىنعانى انىقتالسا، بۇرىنعى مەملەكەتتىك قىزمەتكەرلەر مەن ولاردىڭ وتباسىلارى ول مۇلىكتەن ايرىلادى.

باقىلاۋ شەنەۋنىك جۇمىستان شىققان كۇننەن باستاپ ءۇش جىل بويى جۇرگىزىلەدى. ەكس-شەنەۋنىك شىعىندارىنىڭ سايكەس كەلمەۋى ونى تەكسەرۋگە نەگىز بولا الادى.

باس پروكۋراتۋرا وكىلىنىڭ ايتۋىنشا، قازىرگى تاڭدا مەملەكەتتىك قىزمەتتەگىلەردىڭ عانا شىعىنى تەكسەرىلىپ ءجۇر. ولار جازادان قۇتىلۋ ءۇشىن ادەتتە جۇمىستان كەتىپ جاتادى، سوعان بايلانىستى پروكۋراتۋرا سوتقا ارىزدانۋعا نەگىز تاپپاي قالادى.

ءىىم مالىمەتى بويىنشا، رەسەيدە 2016 جىلى پارانىڭ ورتاشا كولەمى 75 پايىزعا ءوسىپ، 328 مىڭ رۋبل بولعان.

“The Qazaq Times”