جاڭاوزەن حالقى: قىتايلىق 55 زاۋىتتىڭ سالىنۋىنا قارسىمىز

بۇگىن كۇندىز ماڭعىستاۋ وبلىسى جاڭاوزەن قالاسىندا جەرگىلىكتى حالىق قىتايلىق 55 زاۋىتتىڭ قازاقستاندا سالىنۋىنا قارسى جيىن وتكىزدى.

اكىمدىك ماڭىنا جينالعان جۇزگە تارتا تۇرعىن «قىتايدان قايسىبىر ساۋ زاۋىت كەلەدى دەيسىڭ» دەپ كاسىبيلىگىنە كۇمان كەلتىرىپ، شەتەلدىك بيزنەس سەكتوردىڭ كەلۋىن قىتايلىق كادرلاردى تارتۋدىڭ استىرتىن جوباسى دەپ سانايتىنىن ايتتى. كوپشىلىك «كەلەشەگىمىزدى ويلايىق، اۋىزبىرشىلىكتە بولايىق» دەپ ۇرانداستى.

جينالعاندار «ءبىز وتىز جىلدا جەرىنىڭ استىندا مەندەلەەۆتىڭ بۇكىل ەلەمەنتى بار مەملەكەتتە ەڭ سوڭى كۇنىمىز ەكى سيىرعا قاراعان حالگە جەتتىك» دەگەن ورتا جاستاعى ەر ادامنىڭ ءسوزىن قولدايتىنىن ءبىلدىرىپ باقتى. نارازىلار «بيلىك باسىنداعىلارعا» «قىتاي تۋرالى تاقىرىپتى جابۋ كەرەك» دەپ تالاپ قويدى. سونىمەن قاتار ازاماتتار ەل پرەزيدەنتى قاسىم-جومارت توقاەۆقا 11-12 قىركۇيەكتە قىتايعا جوسپارلانعان رەسمي ءىس-ساپاردان باس تارتۋىن سۇراپ، ۇندەۋ جاريالادى.

نارازىلىقتا ەڭ ءجيى ايتىلعان لوزۋنگتىك تالاپتار: «55 زاۋىتتى الىپ كەلۋ – قازاقتىڭ باسىنا كۇن تۋعانى»، «ءبىز جاڭاوزەندىكتەر قىتايلىق 55 زاۋىتتىڭ كىرگىزىلۋىنە قارسىمىز»، «بىزگە گاز، جول ماسەلەسىنەن دە ماڭىزدىسى  55 زاۋىتتى الىپ كەلمەۋ».

اكىمدىك وكىلى مەن اكىم ورىنباسارى امانعالي نۇرداۋلەتوۆ نارازىلار الدىنا شىعىپ، مەكەمە زالىنا كىرۋدى، سوندا ارىز جازۋدى ۇسىندى. جاڭاوزەندىكتەردىڭ نارازىلىق اكتسياسىنا قۇقىق قورعاۋ ورگاندارى كەدەرگى كەلتىرگەن جوق. قىتاي ەكسپانتسياسىنا قارسىلىق كوڭىل-كۇي سوڭعى كەزدەرى قايتا كۇشەيىپ، پيكەت-جيىن تۇرىندەگى قارسىلىق شارالارى ەلىمىزدىڭ تۇكپىر-تۇكپىرىنەن بوي كورسەتە باستادى.

ازاتتىق راديوسىنىڭ حابارلاۋىنشا، قحر – قازاقستانعا ەڭ كوپ ينۆەستيتسيا قۇياتىن – ءتورتىنشى، ەڭ كوپ قارىز بەرەتىن ءۇشىنشى ەل. ال قىتاي بيلىگى «قازاقستاندى شيكىزات كوزى، ساۋدا نارىعى جانە ترانزيت ايماعى رەتىندە پايدالانادى». بىلتىر بەيجىڭ قازاقستانعا 2 ميلليارد 62 ميلليون يۋان كولەمىندە نەسيە بەرگەن. جالپى جيىنى استانانىڭ بەيجىڭگە قارىزى 12 ميلليارد اقش دوللاردان اسادى دەسەدى. Youtube ۆيدەوحوستينگىندە جاريالانعان جيىننىڭ اۋەسقوي ءتۇسىرىلىمى:

"The Qazaq Times"