قىرعىزستان ەكس-پرەزيدەنتى المازبەك اتامباەۆ اقاەۆ پەن باكيەۆ تاعدىرىن قايتالاي ما؟

بىرنەشە كۇننەن بەرى قىرعىزستان قوعامى المازبەك اتامباەۆتىڭ ەلدەن كەتۋىن تالقىلاۋدا. ءبىرى «اتامباەۆ اقاەۆ پەن باكيەۆتىڭ جولىمەن رەسەيگە كەتپەك» دەسە، ەندى ءبىرى «ەكس-پرەزيدەنت قىرعىزستاننان ەشقايدا كەتپەيدى» دەگەن پىكىردە.

«جەل تۇرماسا ءشوپتىڭ باسى قوزعالمايدى» دەگەن ءسوز بار قازاقتا. سول ايتپاقشى، «اتامباەۆ شەتەل اسۋى مۇمكىن» - دەگەن اڭگىمە دە بەكەر ەمەس. وسىدان بىرنەشە كۇن بۇرىن باق بەتتەرىندە «اتامبەۆتى رەسەيدىڭ فەدەرالدى كەدەن قىزمەتىنىڭ ەكس-باسشىسى اندرەي بەليانينوۆ ماسكەۋگە شاقىردى» - دەگەن اقپارات تارادى. اتامباەۆتىڭ ءوزى اتالمىش اقپاراتقا بايلانىستى :«مەنىڭ شەتەلگە بارۋىم مۇمكىن. بىراق تەك بىرنەشە كۇنگە عانا» دەپ قىسقا قايىردى. بۇل ونسىزدا قىزىپ تۇرعان تالقىلاۋلاردى ودان ارى قوزدىردى. ونىڭ ۇستىنە جاقىندا پرەزيدەنت سوورونباي جەەنبەكوۆ رەسەيگە ىسساپارمەن بارىپ، كرەمل باسشىسى ۆلاديمير پۋتينمەن كەزدەستى. ۇزىن قۇلاقتاردىڭ بولجامى بويىنشا، اتالمىش كەزدەسۋدە مەملەكەت باسشىلارى اتامباەۆ جونىندە اڭگىمە قوزعاعان. قىرعىزستاندىق ساياساتتانۋشى مارس ساريەۆتىڭ سوزىنشە، اتامباەۆتىڭ ويىندا رەسەيگە تۇبەگەيلى قونىس اۋدارۋ جوسپارى جوق.

«قازىر اتامباەۆتىڭ ماسكەۋگە شاقىرتۋ الۋى وعان بەلگىلى ءبىر دارەجەدە ساياسي سالماق قوسادى. سول سەبەپتى دە قازىر ونىڭ كوڭىل-كۇيى جاقسى. بىراق ول رەسەيدە قالادى دەگەنگە سەنبەيمىن. ەگەر ول ماسكەۋدە قالاتىن بولسا، بۇل ونىڭ ساياسي يميدجىنە سوققى بولادى جانە ول اقاەۆ پەن باكيەۆتەردىڭ قاتارىنا قوسىلادى. ول رەسەيگە قىسقا ۋاقىتقا بارادى» - دەپ ەسەپتەيدى ساريەۆ.

بۇعان دەيىن رەسەي بيلىگى اتامباەۆ پەن جەەنبەكوۆ اراسىندا بولىپ جاتقان جاعدايلارعا «بۇل قىرعىزستاننىڭ ىشكى ماسەلەلەرى» دەگەن باعا بەرگەن. بىراق جەەنبەكوۆ-پۋتين كەزدەسۋى مەن بەليانينوۆتىڭ اتامباەۆتى ماسكەۋگە شاقىرۋى سينحروندى تۇردە ءجۇرىپ جاتقاندىعىنا قاراعاندا، كرەمل بىشكەك ماڭىنداعى تارتىستى ءجىتى باقىلاۋدا ۇستاپ وتىرعان ءتارىزدى.

جالپى، المازبەك اتامباەۆ ماسكەۋ ءۇشىن وتە قولايلى فيگۋرا. بۇلاي دەيتىن سەبەبىمىز ءدال وسى اتامباەۆتىڭ بيلىك باسىنا كەلۋىمەن قىرعىزستانداعى اقش اسكەري بازاسى جابىلىپ، رەسەيمەن قارىم-قاتىناس قالپىنا كەلتىرىلگەن. بۇعان قوسا اتامباەۆ جەەنبەكوۆ ءتارىزدى كورشىلەس قازاقستان جانە وزبەكستان پرەزيدەنتتەرىمەن اناۋ ايتقانداي جاقسى بايلانىستا بولعان جوق. بۇل ماسكەۋ ءۇشىن وتە ءتيىمدى ەكەندىگى ايتپاسا دا تۇسىنىكتى. ءتىپتى ول ءبىر ۋاقىتتارى قازاقستاننىڭ سول كەزدەگى باسشىسى نۇرسۇلتان نازارباەۆتى ەلدىڭ ىشكى ىستەرىنە ارالاستى دەپ ايىپتاپ، جەردەن الىپ، جەرگە سالعان. سالدارىنان قازاق-قىرعىز شەكاراسىندا بىرقاتار قيىندىقتار ورىن الىپ، كەيىننەن بيلىك باسىنا جەەنبەكوۆتىڭ كەلۋىمەن جاعداي قالپىنا كەلگەن.

"The Qazaq Times"