فرانتسيانىڭ ەكولوگيا ءمينيسترى فرانسۋا دە ريۋجي سالىق تولەۋشىلەردىڭ اقشاسىن شاشتى دەگەن ايىپتاۋلاردان كەيىن وتستاۆكاعا كەتتى.

شەنەۋنىك قوناقتارعا ەڭ قىمبات فرانتسۋز شارابى مەن تەڭىز شايانىنان اس ازىرلەپ، كوپ اقشا جۇمساعان.

دە ءريۋجيدىڭ ءوزى ازاماتتىق قوعام وكىلدەرىمەن كەزدەسۋگە قۇقىعىم بار دەپ، اقتالۋعا تىرىسقانىمەن، وتستاۆكاعا كەتتى.

جانجال تۋعىزعان وقيعا ەكس-مينيستر فرانتسيانىڭ ۇلتتىق كەڭەس توراعاسى بولىپ تۇرعان كەزدە ورىن العان. ارنايى زەرتتەۋ جۇرگىزگەن Mediapart باسىلىمىنىڭ جازۋىنشا، بانكەت پاريجدە بولعان. ونى ساياساتكەردىڭ ايەلى، Gala گلامۋر-باسىلىمىنىڭ ءجۋرناليسى ۇيىمداستىرعان-مىس.

كەشكى اسقا تاپسىرىس بەرىلگەن شاراپتىڭ ءبىر بوتەلكەسى 500 ەۋرو تۇرعان. قوناقتارعا سيرەك كەزدەسەتىن ءارى وتە قىمبات ومار تەڭىز شايانىنان اس ازىرلەگەن. بۇل قورشاعان ورتانى قورعاۋشىلاردىڭ اشۋ-ىزاسىن تۋعىزدى.

كەيىن بەلگىلى بولعانداي، فرانسۋا دە ريۋجي قىزمەت پاتەرىنە 63 مىڭ ەۋروعا كۇردەلى جوندەۋ جۇمىستارىن جۇرگىزگەن. ول اقشانى بيۋدجەت ەسەبىنەن العان. مۇنان بولەك ساياساتكەر فرانتسيانىڭ باتىسىنداعى نانت قالاسىنان مەملەكەتكە تيەسىلى پاتەردى جەڭىلدىكپەن جالداعان.

فرانسۋا دە ريۋجي اتالعان مالىمەتتەردى جاريالاعان Mediapart باسىلىمىن "ۇرلانعان سۋرەتتەردى پايدالانىپ، داقپىرتقا نەگىزدەلگەن جالعان اقپارات بەردى" دەپ سوتقا بەرەتىنىن مالىمدەدى.

Mediapart رەداكتسياسى بولسا، "ساياساتكەرلەردىڭ تابىسى مەن شىعىسىن قوعام باقىلاپ وتىرۋى ءتيىس" دەپ مالىمدەدى.

"The Qazaq Times"