رەسەيدىڭ تەرگەۋ كوميتەتى جەكسەنبى كۇنى ماسكەۋدءىڭ شەرەمەتەۆو اۋەجايىندا بولعان اپاتقا بايلانىستى مالىمدەمە جاسادى.

تەرگەۋ كوميتەتى تاراتقان اقپارات بويىنشا، "اەروفلوت" اۋە كومپانياسىنىڭ "سۋحوي سۋپەردجەت" جولاۋشىلار ۇشاعىنىڭ اپاتقا ۇشىراۋى سالدارىنان 41 ادام كوز جۇمعان (ونىڭ ىشىندە بىرەۋى ەكيپاج مۇشەسى). بورتتا جالپى سانى 78 ادام بولعان.

"اەروفلوت" تىرى قالعان 33 ادامنىڭ اتى-ءجونىن جاريالادى.  ولاردىڭ بەسەۋى اۋرۋحاناعا جاتقىزىلعان. ەكەۋىنىڭ جاعدايى اۋىر. ەكيپاجدىڭ 4 مۇشەسى امان قالعان. ونىڭ ىشىندە ۇشقىش تا بار.

ۇشاق اپاتتى جاعدايدا جەرگە قونىپ، جانىپ كەتكەن. «SU-1492» رەيسى ماسكەۋ – مۋرمانسك باعىتىمەن جەرگىلىكتى ۋاقىت بويىنشا ساعات 17:57-دە اۋەگە كوتەرىلگەن. جارتى ساعات وتكەننەن كەيىن ۇشقىشتار اپاتتى جاعدايدى حابارلاپ، شەرەمەتەۆو اۋەجايىنا قايتا قونعان. "اەروفلوت" ءباسپاسوز حاتشىسى 55 سەكۋند ىشىندە ادامداردىڭ ءبارىن شىعارىپ ۇلگەردىك دەپ مالىمدەدى. بىراق "ينتەرفاكس" دەرەككوزىنە سىلتەمە جاساپ، ۇشاقتىڭ سوڭىنداعى ادامداردى شىعارىپ ۇلگەرمەگەنىن جازدى.

«SU-1492»  ۇشقىشى دەنيس ەۆدوكيموۆ «Baza» باسىلىمىنا بەرگەن سۇحباتىندا «اۋەگە كوتەرىلگەن كەزدە، ۇشاققا نايزاعاي ۇشقىنى تۇسكەنىن» ايتقان. وسىدان كەيىن ۇشاق جارتىلاي بۇزىلىپ، جەرگە قونۋعا ءماجبۇر بولعان. "ينتەرفاكس" مالىمەتىنشە، ۇشاق قونۋ كەزىندە ءۇش رەت جەرگە سوعىلعان.

لاينەر 2017 جىلى شىعارىلىپ، 2019 جىلدىڭ ءساۋىر ايىندا تەحنيكالىق جوندەۋدەن وتكەن. قازىرگى تاڭدا اتالمىش وقيعاعا قاتىستى قىلمىستىق ءىس قوزعالىپ، اپاتتىڭ سەبەبى-سالدارى تەكسەرىلۋدە.

"The Qazaq Times"