اقپارات جانە قوعامدى دامىتۋ ءمينيسترى داۋرەن اباەۆ كەزەكتەن تىس پرەزيدەنت سايلاۋىن وتكىزۋگە بايلانىستى مالىمدەمە جاسادى.

«ەشقانداي اسىعىستىق بولعان جوق. شامامەن ءبىر اي بۇرىن تاريحي ءساتتىڭ كۋاسى بولدىق. حالىق سايلاعان پرەزيدەنت نۇرسۇلتان نازارباەۆ مەرزىمىنەن بۇرىن قىزمەتتەن كەتىپ، بيلىكتى كونستيتۋتسياعا سايكەس، پارلامەنت سپيكەرى قاسىم-جومارت توقاەۆقا تابىستادى. قازىر ول 2015 جىلى حالىق نۇرسۇلتان نازارباەۆقا سەنىپ تاپسىرعان ماندات اياسىندا مىندەتىن اتقارۋدا. وسىعان بايلانىستى توقاەۆتىڭ كەزەكتەن تىس پرەزيدەنت سايلاۋىن وتكىزۋگە بايلانىستى شەشىمى كوڭىلگە قونىمدى ءارى ورىندى» - دەدى اباەۆ.

بۇدان بولەك مينيستر كانديداتتاردى ۇسىنۋ مەرزىمىنە قاتىستى سۇراقتارعا جاۋاپ بەردى.

«ءوز تاراپىمنان پرەزيدەنت سايلاۋلارىنا تۇسىنىكتەمە بەرەيىن. پرەزيدەنت سايلاۋلارى كەزەكتى جانە كەزەكتەن تىس بولادى. كەزەكتى پرەزيدەنت سايلاۋلارى جەلتوقسان ايىنىڭ العاشقى جەكسەنبىسىندە وتەدى. ۇمىتكەرلەر ءوز كانديداتۋرالارىن ەكى اي بۇرىن ۇسىنادى. كەزەكتەن تىس سايلاۋلاردىڭ مەرزىمى باسقا. بۇندا سايلاۋ جاريالانعاننان كەيىن ەكى ايدان سوڭ بولادى. ال كانديداتتاردى ۇسىنۋ جانە تىركەۋ مەرزىمىن ورتالىق سايلاۋ كوميسسياسى جاريالايدى. سول سەبەپتى بۇل جەردە ەشقانداي كولليزيا جوق جانە بولۋى دا مۇمكىن ەمەس» - دەپ مالىمدەدى اباەۆ «حابار» تەلەارناسىنا بەرگەن سۇحباتىندا.

ەستەرىڭىزگە سالايىق، بۇعان دەيىن وسك ۇمىتكەردەردى ءساۋىر ايىنىڭ 28-ىنە دەيىن قابىلدايتىنىن مالىمدەگەن.

"The Qazaq Times"