قىرعىزستان پارلامەنتىنىڭ دەپۋتاتى المامبەت شىكماماتوۆ. فوتو: tazabek.kg

قىرعىزستان پارلامەنتىنىڭ دەپۋتاتى المامبەت شىكماماتوۆ: «قازاقستان قىرعىزستاننان باراتىن كارتوپ، قۇرما جانە انار ونىمدەرىنە ۋاقىتىلى سۋ جىبەرىلمەگەندىكتەن شەكتەۋ قويدى» - دەپ مالىمدەدى.

«انىقتالماعان اقپارات بويىنشا، قازاقستان قىرعىزستاننان باراتىن كارتوپ، انار جانە قۇرما ونىمدەرىنە ۋاقىتىلى سۋ جىبەرىلمەگەندىكتەن شەكتەۋ قويعان. بۇگىن بازارلاردا كارتوپ باعاسى ارزاندايدى. سەبەبى كارتوپتىڭ باسىم كوپشىلىگىن قازاقستان ساتىپ الاتىن. «فيتوسانيتارلىق ەرەجەلەرگە سايكەس كەلمەيدى» دەگەن جاي عانا سىلتاۋ. بۇعان دەيىن ءبىزدىڭ ونىمدەردى ەشقانداي كەدەرگىسىز كىرگىزدى عوي. بۇگىن ەرەجەلەرگە سايكەس كەلمەي قالىپ پا؟ ۇكىمەتتىڭ السىزدىگىنەن، قازاقستانمەن دۇرىس كەلىسسوزدەر جۇرگىزبەگەندىكتەن بۇل پروبلەمانى ءوز دەڭگەيىندە سەزىنبەدىك» - دەدى شىكماماتوۆ جوعارى كەڭەس وتىرىسىندا.

قىرعىزستان ەكونوميكا ءمينيسترى ولەگ پانكراتوۆتىڭ سوزىنشە، بىلتىر قازاقستان ءوز اۋماعىنا قىرعىزستاننان باراتىن ونىمدەر اراسىندا ەشقانداي قۇجاتى جوق تاۋارلاردىڭ بار ەكەندىگى جونىندە اقپارات تاراعان.

«2019 جىلدىڭ قاڭتار ايىنىڭ 24-ءى كۇنى قازاقستان فيتوسانيتارلىق قىزمەتى استانا قالاسىنا قىرعىزستاندىق مامانداردى شاقىرتىپ، اتالمىش ماسەلەگە قاتىستى كەلىسسوزدەر جۇرگىزىلگەندىگى بەلگىلى بولدى. وندا قازاقستان تاراپى ارنايى حاتتاما تولتىرىپ، ماسەلەنىڭ شەشىلۋىنە ءبىر اي ۋاقىت بەرگەن جانە تالاپتار ورىندالماعان جاعدايدا شەكتەۋلەر بولاتىنىن ەسكەرتكەن» - دەپ مالىمدەدى پانكراتوۆ.

ەستەرىڭىزگە سالايىق، بۇعان دەيىن قىرعىزستان دەپۋتاتتارى قازاقستان مەن وزبەكستانعا سۋ ساتۋ كەرەكتىگىن ايتىپ باستاما كوتەرگەن. ولاردىڭ سوزىنشە، قازاقستان مەن وزبەكستان وسى ۋاقىتقا دەيىن قىرعىزستاننان باراتىن سۋدى پايدالانعانى ءۇشىن ەشقانداي قارجى تولەمەگەن. تەك سۋ قويمالارىن جوندەۋدەن وتكىزۋ ءۇشىن عانا قارجى بەرىپ كەلگەن.

"The Qazaq Times"